Aqtóbe men Qyzylorda oblystarynyń taýar óndirýshileri kezdesti
QYZYLORDA. QazAqparat - Búgin Qyzylordada Aqtóbe oblysynyń kúnderi ótýde. Osy oraıda oblystyq kásipkerler palatasy men oblystyq kásipkerlik jáne týrızm, oblystyq ındýstrııalyq-ınnovatsııalyq damý basqarmalarynyń uıymdastyrýymen eki oblystyń taýar óndirýshi kásiporyndary arasynda semınar keńes ótti, dep habarlady QazAqparat tilshisi oblystyq ákimdikke silteme jasap.
Jıynǵa, Qyzylorda oblystyq kásipkerlik palatasynyń dırektory Ǵalymbek Jaqsylyqov, oblystyq ındýstrııalyq-ınnovatsııalyq damý basqarmasy bastyǵynyń orynbasary Elaman Jolmyrza, sondaı-aq aqtóbelik kásiporyn basshylary men seriktestik ókilderi qatysty.
Kezdesý eki jaqty qarym qatynasty odan ári damytyp, taýar aınalymyn ulǵaıtý maqsatynda uıymdastyrylǵan. Jıyn barysynda Aqtóbe oblysynyń taýar óndirýshi kásiporyndary ózderiniń óndiretin ónimderin keńinen nasıhattap, jergilikti kásiporyndarǵa tanystyrdy.
