Aqtóbe men Qostanaı oblystarynyń ákimderi yntymaqtastyq memorandýmyna qol qoıdy
AQTÓBE. QazAqparat - Qostanaı oblysy Aqtóbege lıtf tasymaldaıdy. Elektromobılder jetkizip, olarǵa qajetti qýattandyrý beketin salady, dep habarlaıdy QazAqparat tilshisi.
Aqtóbe men Qostanaı oblystary aımaqaralyq kooperatsııany damytý maqsatynda birneshe memorandýmǵa qol qoıdy. Qostanaı oblysy Aqtóbege lıft jetkizedi. Elektromobılder satylyp, olardy qýattandyratyn beketter salynady. Ázirge bul kólikter Almaty men Astanada bar. Endi Aqtóbe halqy elektrli kóliktiń múmkindikterin paıdalana alady.
«Óndiris, aýyl sharýashylyǵy salasynda birneshe kelisim jasaldy. Taıaýda Aqtóbede Qostanaı oblysynyń kúnderi ótedi. Al keler jyly Qostanaı qalasynda Aqtóbe oblysynyń kúnderi ótedi. Aýyl sharýashylyǵy jármeńkesi uıymdastyrylyp, eki óńir kásipkerleriniń tájirıbe almasýy úshin bıznes forým ótkiziledi. Jospar boıynsha Aqtóbege elektromobıl tasymaldanady. Aglomıratsııa qataryna engen óńir úshin bul tıimdi joba. Keler jyly Aqtóbede elektromobılderdi qýattandyrý stantsııasy salynady. Infraqurylym damyǵan soń kólik satylady», - dedi Qostanaı oblysynyń ákimi Arhımed Muhambetov.
Qostanaı oblysy Marat Ospanov atyndaǵy Batys Qazaqstan memlekettik medıtsınalyq ýnıversıtetimen kelisimshartqa qol qoıdy. Sebebi, Qostanaıda bilikti dáriger tapshy. Oblys ákimi Arhımed Muhambetov jas mamandarǵa 2-2,5 mıllıon teńge qarjy berip, olardyń baspanaly bolýyna jaǵdaı jasamaq. Tek jas kadr ákimdik baǵyttaǵan aýyl, aýdanda 7 jyl boıy úzdiksiz jumys isteýi kerek.
Forým kezinde Aqtóbe oblysynyń ákimi Berdibek Saparbaev pen «Shengyuan Technology Co Ltd» AQ basqarma tóraǵasy Ge Paısıan ekijaqty memorandýmǵa qol qoıdy. Qytaılyq kompanııa tabıǵı gazdan ınnovatsııalyq jolmen óndirilgen ónim alady. Bul ónim boıaý jáne baspahana ónerkásibine paıdalanylady. Investıtsııa quny - 7 mıllıard teńge. Al Aqtóbe oblysy ákiminiń orynbasary Qaırat Bekenov pen «Nıtrohım kompanııalar toby» JShS basqarma tóraǵasy Rınat Tájmuratov óndiristik jarylǵysh zattarǵa arnalǵan ammıakty selıtra shyǵarady. Óńdeý ónerkásibi 1 myń adamǵa jumys taýyp beredi. Joba quny - 130 mıllıard teńge. Sonymen qatar, jylyjaı keshenin salý, etti eksporttaý memorandýmdaryna qol qoıyldy. Jospar boıynsha Reseıge jylyna 1 myń tonna et eksporttalady. «Aqtóbe et klasteri» JShS etti Iran, BAÁ, Qytaıǵa tasymaldaý joldaryn izdestirip jatyr.
Aıta keteıik, forým kezinde barlyǵy quny 209 mıllıard teńgeden asatyn 11 memorandýmǵa qol qoıyldy.
