Aqtóbe men Qostanaı oblystarynda shegirtkege qarsy kúres sharalary kúsheıtilmek
ASTANA. KAZINFORM – Shegirtkeler kóp taralýy múmkin óńirlerde jerdi aýqymdy óńdeý jumystaryn bastaý úshin tehnıka, pestıtsıdterdiń qajetti qory daıyn tur, ýaqytsha jumysshylar jappaı tartyla bastady.
Úkimette zııankestermen kúresý boıynsha qazirgi jaǵdaı shegirtkege qarsy qorǵanys sharalaryn úılestirý jónindegi respýblıkalyq jedel shtabtyń úshinshi otyrysynda talqylandy. Aýyl sharýashylyǵy mınıstri Aıdarbek Saparov tóraǵalyq etti.
«31 mamyrdaǵy jaǵdaı boıynsha Túrkistan oblysynda 259,3 myń gektar jerde marokko shegirtkesiniń dernásilderine qarsy óńdeý jumystary júrgizildi. Bul boljamdy kólemniń 95,5%-y. Jambyl oblysynda qorǵaý sharalary tolyǵymen aıaqtaldy: 9,8 myń ga nemese 100% óńdeldi. Italııalyq prýsqa qarsy qorǵanys sharalary bastaldy. 2,2 mln gektardyń 144,1 myń gektary Aqtóbe, Almaty, Atyraý, Jambyl, Jetisý, Batys Qazaqstan, Qostanaı jáne Qyzylorda oblystarynda óńdeldi. Basqa aımaqtarda ıtalııalyq prýsqa qarsy hımııalyq óńdeý dernásilderdiń paıda bolý oryndary anyqtalǵan kezde bastalady. Pestıtsıdter barlyq óńirlerge qajetti kólemde jetkizildi», — delingen habarlamada.
Jetisý oblysynda azııalyq shegirtkege qarsy hımııalyq óńdeý jumystary bastaldy. Munda 950 gektardan 200 ga óńdeldi.
«Shegirtkege qarsy óńdelýi tıis alańdardyń eń úlkeni Aqtóbe (784,4 myń ga) jáne Qostanaı (775,6 myń ga) oblystarynda ornalasqan. Ákimdikterdiń málimetinshe, dál qazir osy oblystardyń ońtústik aýdandarynda ıtalııalyq prýs dernásilderiniń belsendi túrde paıda bolý kezeńi júrip jatyr. Alaıda, óńirler buǵan daıyn otyr», — dep habarlady Úkimettiń baspasóz qyzmeti.
Mysaly, Qostanaı oblysynda óńdeý jumystary óńirdiń 17 aýdanynyń 15-de júrgiziletin bolady. Ol úshin 72 birlik tehnıka jumyldyrylady. Naqty taralý oryndaryn anyqtaý úshin monıtorıngtik is-sharalar 5 mln gektarǵa jýyq aýmaqta josparlanǵan. Bul jumystarǵa 129 tekserýshi tartylatyn bolady. Sonymen qatar árbir aýyldyq okrýgte hımııalyq óńdeý jumystaryn júrgizý úshin ýaqytsha jumysshylardy qabyldaý jáne olardy oqytý jumystary qolǵa alynǵan. Qazirdiń ózinde 326 adam tartyldy.
Otyrys qorytyndysy boıynsha Aıdarbek Saparov óńirlik shtabtarǵa Memlekettik ınspektsııa komıtetiniń aýmaqtyq bólimshelerin júrgizilip jatqan jumystardyń jaı-kúıi týraly kún saıyn habardar etýdi tapsyrdy. Qajet bolǵan jaǵdaıda birden qosymsha tehnıka tartyp, ýaqytsha jumysshylardy múmkindiginshe kóbirek tartý tapsyryldy. Túrkistan oblysynda qosymsha joıý jumystary júrgizilýi qajet.
