«Aqtóbe» men «Ertis» FK Eýropa lıgasynyń kelesi kezeńine ótti
ALMATY. 12 shilde. QazAqparat - Keshe Pavlodarda «Ertis» fýtbol komandasy Eýropa lıgasynyń dárejelik raýndy aıasynda
Bolgarııanyń Sofııa qalasynyń «Levskı» quramasyn 2:0 esebimen oısyra utyp, qazaqstandyq aıaqdopshylar arasynda birinshi bolyp Lıganyń kelesi kezeńine ótti. Talǵat Basýfınov jattyqtyratyn pavlodarlyqtar buǵan deıin, 4 shilde kúni syrt alańdaǵy alǵashqy kezdesýde qarsylasymen 0:0 esebimen tarasqan bolatyn. Olardyń jeńisti jolyn odan keıin óz alańynda «Aqtóbe» fýtbol klýby ary qaraı jalǵastyrdy. Armenııanyń Kapan qalasynan kelgen «Gandzasar» aıaqdopshylaryn 2:1 esebimen utqan V.Nıkıtenko baptaıtyn alań qojaıyndary syrt alańdaǵy alǵashqy kezdesýde de 2:1 esebimen jeńiske jetken bolatyn. Sonyń nátıjesinde olar da aıqyn basymdyqpen Eýropa lıgasynyń kelesi kezeńine joldama aldy.
Al Bolgarııanyń Býrgas qalasynda Plovdıv qalasynyń «Botev» komandasymen kezdesken «Astana» fýtbol klýby jeńilistiń aşy dámin tatty. Mıroslav Beranek tizginin ustaǵan «astanalyqtar» buǵan deıin óz alańynda 0:1 esebimen ese jiberse, bul joly 0:5 esebimen oısyraı jeńildi. Stanımır Stoılov baptaıtyn plovdıvtikter qonaqtar qaqpasyna jaýapsyz soǵylǵan 5 dopty da oıynnyń ekinshi jartysynda engizdi.
