Aqtóbe men Atyraýda aýa sapasynyń nasharlaýy boljanyp otyr

ASTANA. KAZINFORM — Sınoptıkterdiń boljamynsha, 22 jeltoqsanda Aqtóbe qalasynda, al túngi ýaqytta Atyraýda qolaısyz meteorologııalyq jaǵdaılar kútiledi, dep habarlaıdy «Qazgıdromet» RMK.

Meteorologtardyń málimetinshe, qolaısyz meteorologııalyq jaǵdaılar – álsiz jel, tuman, aýa temperatýrasynyń ınversııasy sııaqty qysqa merzimdi faktorlardyń jıyntyǵy. Mundaı jaǵdaıda atmosferanyń tómengi qabatynda zııandy (lastaýshy) zattardyń jınalýyna qolaıly orta qalyptasady.

Qolaısyz meteorologııalyq jaǵdaılar kezinde eldi mekenderde atmosferalyq aýanyń sapasy nasharlaýy múmkin. Bul óz kezeginde halyq densaýlyǵyna keri áser etedi.

Aýadaǵy lastaný deńgeıiniń qalyptasýyna áser etetin negizgi faktorlardyń biri – sınoptıkalyq jaǵdaıdyń boljamy. Oǵan jeldiń baǵyty men jyldamdyǵy, jaýyn-shashyn, aýa ylǵaldylyǵy jáne temperatýra kórsetkishteri jatady.

Qolaısyz meteorologııalyq jaǵdaılar kezinde turǵyndarǵa mynadaı saqtyq sharalary usynylady:

– avtojoldar men lastaýshy kózderge jaqyn jerlerde bolmaýǵa tyrysyp, ashyq aýada júrý ýaqytyn qysqartý. Balalar men júkti áıelderge uzaq serýendeýden bas tartý kerek;

– ókpe, júrek-qan tamyrlary, allergııalyq sozylmaly aýrýlary bar adamdar syrtqa shyqqanda ózine qajetti dári-dármekterdi alyp júrýi tıis;

– ashyq aýada fızıkalyq júktemeni shekteý, dene shynyqtyrý jáne sportpen jabyq sport keshenderinde aınalysý qajet.

Buǵan deıin Qazaqstannyń barlyq óńirinde daýyldy eskertý jarııalanǵany habarlanǵan bolatyn.