Aqtóbe memlekettik-jekeshelik áriptestik aıasynda áleýmettik nysandar salý tájirıbesimen bólisti
AQTÓBE. QazAqparat - Aqtóbede ótip jatqan ınvestıtsııalyq forým kezinde memlekettik-jekeshelik áriptestik aıasynda salynyp jatqan áleýmettik nysandar tanystyryldy. Kásipkerler memletketpen áriptestik aıasynda qurylys jumystaryn júrgizý joldaryn túsindirdi, dep habarlaıdy QazAqparat tilshisi.
Aqtóbede ınvestıtsııalyq forým ótip jatyr. Forýmǵa álemniń 20 elinen 400-ge jýyq adam qatysyp jatyr. Buǵan deıin habarlaǵanymyzdaı, forým aıasynda óndiristik, aýyl sharýashylyǵy salasyndaǵy zaýyt, kombınattardyń jumysy tanystyryldy .
Búgin forým aıasynda «Memlekettik-jekeshelik áriptestik: tájirıbe jáne damý bolashaǵy» atty jıyn ótti. Jıynǵa kásipkerler, memlekettik organdardyń jáne ekinshi deńgeıli bankterdiń ókilderi qatysady. Sharaǵa «Qazaqstandyq memlekettik-jeke menshik áriptestik ortalyǵy» AQ vıtse-prezıdenti Aıdos Kóbetov qatysty. Aqtóbelik kásipkerler memleketpen birlese qurylys jumystaryn júrgizýdiń artyqshylyqtaryn aıtyp berdi.
«Aqtóbedegi oftalmologııalyq ortalyq elimizdiń batys óńirine qyzmet kórsete alady. Buǵan deıin naýqastar Reseıge baryp em qabyldap júrdi. Endi sol olqylyqtyń ornyn toltyryp, kózge arnalǵan kúrdeli otalar jergilikti jerde jasalady. Aqtóbe medıtsınalyq klaster ortalyǵyna aınalǵan soń jańa qurylys jumystary bastaldy. Buǵan deıin biz «Darý» ońaltý ortalyǵyn salǵan bolatynbyz», - dedi ortalyq dırektory Ǵalymjan Eleýov. Onyń aıtýynsha, oftalmologııalyq ortalyqta 60 kereýetti aýrýhana bolady. Ortalyqta kúnine 500 adamdy qabyldaıtyn emhana jumys isteıdi. Qazirgi ýaqytta qurylys jumystary aıaqtaldy. Kóz emdeýge, ota jasaýǵa arnalǵan qural-jabdyqtar jetkiziledi. Sonymen qatar, dáriger mamandardyń bári Eýropada bilimin jetildirip jatyr.
Aqtóbe oblysynda elimizde alǵash ret jedel járdem qyzmeti jekeniń basqarýyna berildi. Túrik kompanııasy 5 jyl ishinde jedel kómók kórsetý stantsııasy túgel jabdyqtap, mamandardyń biliktiligin arttyrady. Alǵashqy reanımobılder ótken jyly paıdalanýǵa berildi. 
Jedel medıtsınalyq kómek beketi 3 qabatty bolady. Munda qurylys jumystary aıaqtaldy. Ortalyqta E-formatty analıtıkalyq, aqparattyq jáne dıspetcherlik basqarý júıesi jumys isteıdi. «Alǵashqy kómek» JShS-nyń dırektory Baqytjan Turmetovtiń aıtýynsha, ortalyqtaǵy zamanýı apparat jedel járdem brıgadasynyń qozǵalysyn baqylaýǵa, shaqyrý túsken kezde eń jaqyn ornalasqan kólikterge tapsyrma berige múmkindik bar.
Aıta keteıik, memlekettik-jekeshelik áriptestik aıasynda Aqtóbede Hokkeı modýli, Jekpe-jek saraıy, birneshe mektep men balabaqsha paıdalanýǵa berildi. 
