Aqtóbe mektepterinde jarylys bolatyny týraly habarlama taraı bastady

AQTÓBE. KAZINFORM — Polıtsııa tergeý jumysyn bastady. Adamdardy jalǵan habarlamaǵa senbeýge shaqyrdy.

Áleýmettik jelide Aqtóbe qalasyndaǵy onnan astam mektepte jarylys bolyp, balalarǵa qastandyq jasalatyny týraly habarlama tarady. Polıtsııa sotqa deıingi tergeýdi bastady.

— Polıtsııa departamenti terrorızm aktisi týraly kórineý jalǵan habar taratý deregi boıynsha sotqa deıingi tergep-tekserý júrgizip jatyr. Aqparatty taratqan tulǵalardy anyqtaý baǵytynda jedel is-sharalar qabyldandy. Kúdiktiler jaqyn arada anyqtalyp, elimizdiń zańnamasyna sáıkes jaýapqa tartylady. Sonymen birge bilim berý uıymdaryndaǵy qaýipsizdik sharalary kúsheıtildi. Mektepterde beınebaqylaý júıeleriniń jumysy kúsheıtilip, oqý oryndary mańynda polıtsııa jasaqtarynyń sany artty. Azamattardy jalǵan málimetterge senbeýge jáne tek resmı derekkózderge júginýge shaqyramyz, — dep habarlady oblystyq PD baspasóz qyzmeti.

Eske salsaq, 9-qarashada dál osyndaı habarlama Aqtaý qalasynda da tarady. Polıtsııa departamenti bul habarlamalardyń taralý kózin anyqtap, áleýmettik jelilerdegi aqparat boıynsha tekserý jumystary júrgizilip jatqanyn jetkizdi.