Aqtóbe mektepterinde sabaq onlaınǵa kóshirilmeıdi
AQTÓBE. KAZINFORM – Aqtóbe qalasynda taraǵan habarlamalarǵa qaramastan erteń sabaq kestesinde ózgeris bolmaıdy. Alaıda polıtsııa qaýipsizdik úshin kúzetti kúsheıtedi.
Aqtóbe qalasyndaǵy 100-den astam mekteptiń bárinde sabaq ádettegideı óte beredi. Oblystyq Bilim basqarmasy áleýmettik jelidegi kanalǵa jazylǵan qorqytyp-úrkitý habarlamasy jalǵan ekenin málimdep, resmı aqparatqa ǵana súıenýge shaqyrdy.
– Ata-analardy dúrbeleńge túspeýin jáne tek resmı derekterge súıenýin, sondaı-aq jalǵan aqparattyń taralýyna yqpal etpeýin suraımyn. Qala mektepteri ádettegideı, shtattyq rejimde jumys isteıdi, mektepterdiń eshqaısysynda tótenshe jaǵdaılar tirkelmegen. Mektepterge jasalǵan shabýyldar týraly aqparattyń jalǵan ekendigi senimdi túrde anyqtaldy. Qashyqtyqtan oqytý formatyna aýysýǵa eshqandaı sebep joq», - dedi Jaıyq Sultan.
Eske salsaq, Aqtóbe mektepterine terrorlyq shabýyl jasalatyny týraly aqparat tarap, kópshilik úreıge boı aldyrdy. Aqtóbe oblysynyń ákimi birden atalǵan mektepterge baryp, qaýipsizdik júıesiniń jumysymen tanysty. Qazirgi kezde qylmystyq is qozǵalyp, sotqa deıingi tergep-tekserý júrip jatyr.
