Aqtóbe mektepterinde oqýshylardyń jas ereksheligine baılanysty tamaqtaný tártibi áli engizilmedi
AQTÓBE. KAZINFORM — Qazirgi kezde tamaqtaný máziri men qunyn bekitý jumysy áli aıaqtalmaǵan. Sonymen birge jeke kásipkerler «Alaqan» júıesiniń de keıde naqty derekti tirkemeıtinin aıtyp shaǵymdandy.
Aqtóbede jeke kásipkerler Óńirlik kásipkerler palatasyna jınaldy. Munda olar oqýshynyń as máziri, onyń qunyn bekitýdi surady. Bólshek saýda jáne qoǵamdyq tamaqtaný qaýymdastyǵynyń vıtse-prezıdenti Marına Laptevanyń aıtýynsha, «Alaqan» júıesiniń de jıi isten shyǵyp, keıbir oqýshy tirkelmeı qalyp jatyr. Al Qazaqstanda bıyl 1 qyrkúıekten bastap jańa tamaqtaný standary engizildi. Talap boıynsha oqýshylar jas ereksheligine qaraı tamaqtanýy tıis.
— Óńirde jas erekshelikterine qaraı tamaqtaný tártibi áli engizilmedi. Sonymen birge onyń quny da bekitilmedi. Máselen 1–4 synyptar úshin — 678,5 tg, 5–9 synyptar úshin — 760,99 tg, 10–11 synyptar úshin — 800 tg bolýy tıis. Olarda bekitetin buıryq joq, sondyqtan mektepter áli kúnge deıin biryńǵaı baǵany qoldanyp keledi. ıAǵnı Úkimettiń Qaýlysynyń talaptary buzyldy, — dedi Marına Lapteva.
Al «Alaqan» júıesindegi tehnıkalyq aqaý, ınternettiń isten shyǵýy jeke kásipkerlerdiń shyǵynyn kóbeıtedi. Mundaıda kásipkerler oqýshylardyń esebin de júrgizedi. Kásipkerler bolsa mektep ákimshiligi tizimdi aldyn ala berýi tıis degen ýáj aıtty.
Óńirlik kásipkerler palatasy Aqtóbe oblysynyń bilim, densaýlyq saqtaý, ekonomıka jáne bıýdjetti josparlaý basqarmalaryna, oblystyq sanıtarııalyq-epıdemıologııalyq departamentine jańa tamaqtaný standartyn engizýdi yjdaǵattaýdy usyndy.
Aqtóbe oblystyq densaýlyq saqtaý basqarmasy jańa standartqa saı mázirdi bıyl qazan aıynda bekitip, oblystyq sanıtarııalyq-epıdemıologııalyq basqylaý departamentine, oblystyq bilim basqarmasyna jibergen. Aqtóbe oblystyq sanıtarııalyq-epıdemıologııalyq baqylaý departamenti bilim berý uıymdaryndaǵy as máziri jáne as máziriniń qunyn bekitý ózderiniń quzyryna kirmeıtinin jetkizdi. Al bilim basqarmasy jańa talap tek eki mektepke engizilgenin habarlady.
— Bilim berý uıymdaryndaǵy birrettik perspektıvalyq as mázirin bekitý quzyreti oblystyq densaýlyq saqtaý basqarmasyna berildi. 2025 jyldyń 1 qyrkúıeginen bastap as máziri bólingen bıýdjet qarajatyn eskere otyryp bekitildi. Sonymen birge 2026 jylǵa arnalǵan jańa standarttar negizindegi as mázirine tıisti qarajat bólindi, — dep habarlady Aqtóbe oblystyq bilim basqarmasynyń baspasóz qyzmeti.
Aıta keteıik, Densaýlyq saqtaý mınıstri 2025 jylǵy 4 naýryzdaǵy buıryǵymen densaýlyq saqtaý jáne bilim berý uıymdarynda tamaqtaný standarttarynyń jańa erejesin bekitti.