Aqtóbe mektepterinde 400-ge jýyq pedagogtiń orny bos tur
AQTÓBE. KAZINFORM - Muǵalim qala jáne barlyq aýdan mektebine kerek. Sonymen birge aýyl mektebin saqtaý úshin otbasylardy qaladan aýylǵa kóshirý jumysy júrip jatyr.
Aqtóbe oblysy ákimdiginde 2026–2027 oqý jylyna daıyndyq jaıy talqylandy. Oblystyq bilim basqarmasynyń basshysy Bulbul Kúzembaevanyń aıtýynsha, búginde 7 120 orynǵa arnalǵan 15 mektep, sondaı-aq IT-hab pen arnaıy balabaqsha salynyp jatyr.
Oqý jyly bastalǵanǵa deıin jalpy syıymdylyǵy 5 030 oryn bolatyn 7 jańa mektepti ashý jáne №8 orta mektep pen D.Qonaev atyndaǵy mektep-gımnazııasynyń qosymsha ǵımaratyn qoldanysqa berý josparlanǵan. Atap aıtqanda Aqtóbe qalasy Altyn Orda shaǵyn aýdanynda, Ońtústik-Batys-2 jáne Shılisaı-1 turǵyn alaptarynda mektep ashylady. Sondaı-aq Muǵaljar aýdanynyń Aşysaı aýylynda, Temir aýdanynyń Keńqııaq jáne Shubarqudyq aýyldarynda, Mártók aýdanynyń Keńsahara aýylynda mektep qoldanysqa beriledi.
- Búginde oblys mektepterinde 396 pedagog jetispeıdi. Mundaı qajettilik barlyq aýdanda jáne Aqtóbe qalasynda bar. Bıyl joǵary oqý oryndarynyń pedagogıkalyq mamandyqtaryn 1 362 túlek, kolledjderdi 605 túlek bitirdi. Olardyń ishinde 31 túlek grant boıynsha bilim alǵan. Olar matematıka, fızıka, hımııa jáne bastaýysh synyp muǵalimderi jáne oblys mektepterine jumysqa ornalasady. Qalǵan túlekter úshin 10-14 tamyz aralyǵynda bos jumys oryndary jármeńkeleri uıymdastyrylady,– dedi Bulbul Kúzembaeva.
Qazir oblysta 10 bilim berý uıymynda kúrdeli jóndeý jumystary jalǵasyp jatyr. Oǵan 3,2 mlrd teńge bólingen. 31 mektepke hımııa, fızıka, bıologııa, STEM jáne robototehnıka pánderine arnalǵan 60 zamanaýı kabınet jasaqtalady. Oǵan 556 mln teńgege satyp bólindi. Oqýlyqtar satyp alýǵa 1,2 mlrd teńge qarastyryldy.
- Byltyr 115 otbasy qaladan 61 aýylǵa qonys aýdaryp, baspanamen qamtyldy, sharýashylyq júrgizýge kómek alyp, jumysqa ornalasýyna qoldaý kórsetildi. Nátıjesinde aýyl mektepterindegi oqýshylar sany 244 balaǵa artqan. Jańa oqý jylynda oblys mektepterinde 194 myńnan astam oqýshy bilim alady. Birinshi synypqa 20 234 balany qabyldaý josparlanyp otyr. Búginde 17 413 bala qujat tapsyrǵan. Qujattardy qabyldaý 31 tamyzǵa deıin jalǵasady, - dep habarlady Aqtóbe oblysy ákiminiń baspasóz qyzmeti.
Eske salsaq, Aqtóbede úsh aýysymdy mektep janyndaǵy jańa ǵımarat qurylysy 4 jylǵa sozyldy.
