Aqtóbe mektepterinde 7 myńnan astam kamera bar
Іshki ister mınıstrligi men Bilim mınıstrligi birlesip, oqý oryndaryndaǵy qaýipsizdikti kúsheıtý úshin birqatar shara qabyldady. Aqtóbedegi barlyq oqý ornynyń terrorızmge qarsy qorǵaný jumystary men atqarylǵan isi tekserildi. Qazirgi kezde oblystaǵy 412 mektepte beınebaqylaý kamerasy bar. Barlyǵy 7074 kameranyń 2644-i syrtta, al ózgesi ǵımarat ishine ornatylǵan. Búgingi kúni Jedel basqarý ortalyǵy jáne polıtsııanyń kezekshi bólimderindegi beınebaqylaý kameralarymen ıntegratsııalaý jumys júrgizilip jatyr. Sońǵy málimetke súıensek, quqyq qorǵaýshylar qaladaǵy 28 mekteptiń kamerasy arqyly bilim ordasyndaǵy mán-jaıdy baqylap otyr. Sondaı-aq, oqý oryndaryna metall detektorlar, týrnıketter, dabyl túımeleri ornatyldy. Oblystyq PD bastyǵy Atyǵaı Arystanovtyń aıtýynsha, keıbir mekteptiń oqýshylary arnaıy elektrondy bileziktermen kirgiziledi. Jańa bilezik arqyly ata-analar óz balalaryn baqylaı alady. Al joǵary synyp oqýshylary mektepke kirgen kezde elektrondy kartalardy paıdalanady. Sonymen qatar, qaýipsizdikti qamtamasyz etý úshin 120-ǵa jýyq orta mektep kúzet uıymdarymen kelisimshartqa qol qoıdy. Kúzet qyzmetkerleri ýchaskelik polıtsııa ınspektorlarymen birge áreket etedi. Jańa oqý jylynan bastap olardy qosymsha oqytý, nusqama berý josparlanǵan. Sondaı-aq jol qozǵalysy qaýipsizdigin qamtamasyz etý úshin Biryńǵaı ınteraktıvti sabaq ótkiziledi.
«Jyl basynan beri oblys joldarynda balalardyń qatysýymen 63 jol-kólik oqıǵasy boldy. Onda kámeletke tolmaǵan 2 bala qaza taýyp, 75 bala túrli jaraqat aldy. Oqý jylynyń bastalýyna baılanysty oqýshylarǵa da, olardyń ata-analaryna qarapaıym qaýipsizdik sharalaryn saqtaý qajettiligi týraly eskertý jasaldy», - dedi oblystyq PD bastyǵy Atyǵaı Arystanov.
Polıtsııa departamenti mektep mańy men kórshiles kóshelerdi tekserdi. Kemshilikterdi joıýǵa 53 uıǵarym berdi. Qosymsha 61 jol belgisi ornatyldy.
