Aqtóbe mektebindegi oqıǵa: Dárigerler oqýshynyń jaǵdaıy týraly aıtty
AQTÓBE. QazAqparat - Aqtóbelik dárigerler mektep ǵımaratynda tóbeniń aspaly jabyndysynyń qulaýynan zardap shekken balanyń densaýlyǵy týraly aıtty, dep habarlaıdy QazAqparat tilshisi.
Eske salaıyq, 30 qarasha kúni Aqtóbe qalasyndaǵy №40 mektepte tóbeniń aspaly jabyndysy oqýshylardyń ústine qulap, 10 bala zardap shekken bolatyn. Dárigerlerdiń baqylaýyna alynǵan 9 oqýshynyń barlyǵy oblystyq balalar aýrýhanasyna jetkizildi. Keıinnen bir baladan basqasynyń barlyǵy úılerine qaıtaryldy. Arnaıy komıssııa qurylyp, tekserý jumystary bastaldy.
Balalar aýrýhanasynyń dárigerleri oqýshyny baqylaýǵa alyp, kompıýterlik tomografııa jasaýdy josparlap otyr.
«14 jastaǵy oqýshy 30 qazan kúni aýrýhanaǵa jetkizildi. Oǵan «jabyq bas-mıynyń shaıqalýy» dıagnozy qoıyldy. Jaǵdaıy - ortasha aýyr. Tıisti emin alyp jatyr», - dedi balalar aýrýhanasynyń neırohırýrg dárigeri Baǵdat Jumabaeva.
Al aýrýhanada jatqan oqýshynyń anasy Maral Týsına bolǵan oqıǵaǵa qatysty shaǵym jazbaıtynyn aıtty.
«Ózim úıde bolǵanmyn. Qyzym telefon shalyp, aýrýhanaǵa alyp bara jatqanyn jáne ata-analardyń kelýi qajettigin aıtty. Ózim de dárigermin. Ózim qarap, teksergen kezde jaraqatyn kórmedim. Rentgenge túsirdi, qabyldaý júrgizdi. Hırýrg aýrýhanaǵa jatqyzýǵa sheshim qabyldady. Qyzym oqıǵany dál aıta almaıdy. Qoryqqan, biraq basyna esh nárse túspegen. Áli de basy aınalyp, loqsıdy. Buryn da jıi aýrýhanaǵa túsip, tamyzda ót jolyn aldyrǵan edi. Sonyń da áseri bar dep oılaımyz. Esh shaǵym aıtpaımyn», - dedi oqýshynyń anasy Maral Týsına.
Oqýshy qyz tóbe japsyrmasy ıyǵyna qulaǵanyn, basyna zaqym kelmegenin aıtyp berdi.
«Balalar tóbe japsyrmasy qulaǵan kezde qorqyp qaldy. Bárin aýrýhanaǵa ákelgen kezde densaýlyqtary jaqsy dep aıtty. Ózim jaqsymyn, esh aýyrlyq sezip júrgen joqpyn», - dedi oqýshy.
Anyqtalǵandaı, Aqtóbedegi №40 orta mektepte merekelik shara ótip jatqan. Dál sol kezde fleshmob bıleýge daıyn turǵan 10 balanyń ústine tóbeniń aspaly jabyndysy qulaǵan.
«Mektepte merekelik shara uıymdastyryldy. Saǵat 12:40 shamasynda májilis zaly janyndaǵy kıinetin bólmede tóbe japsyrmasy qulady. Fleshmob bıleıtin bir top bala sol jerde turǵan edi. Qabyrǵasy bıik bólme. Balalardyń órmelep shyǵýy, taıaqpen túrtkileıtindeı jaǵdaı bolmady. Tóbe japsyrmasy ilingen sym úzilip ketken», - degen bolatyn №40 orta mektep dırektory Baýyrjan Sarın.
Zardap shekkenderdiń barlyǵy 6-synyp oqýshylary.
