Aqtóbe mektebinde jaraqattanǵan oqýshyǵa qatysty tekserý bastaldy
AQTÓBE. QazAqparat - Aqtóbede mektepte oqýshy ernin jyryp alǵan. Oqys oqıǵa Bestamaq orta mektebinde tirkeldi, dep habarlaıdy QazAqparat tilshisi.
Aqtóbe oblysy Bestamaq aýlynyń oqýshysy mektepte ernin jyrtyp aldy. Dárigerler oqýshynyń ernin tigip bergen. Qazir osy oqıǵaǵa baılanysty komıssııa quryldy.
Óńirlik kommýnıkatsııa qyzmetiniń habarlaýynsha, oblys ákimi Ońdasyn Orazalınniń tapsyrmasymen atalmysh derek boıynsha tekseris júrgizý úshin
bilim jáne densaýlyq saqtaý basqarmalarynyń qyzmetkerlerinen turatyn komıssııa jumys isteýde. Tekseris nátıjesi boıynsha jaýapty tulǵalardyń is-áreketterine baǵa berilip, tıisti sharalar qabyldanady.
«Meniń balamnyń aty Ibrahım. Ol 6 jasta. 28.02.2019 jyly Bestamaq orta mektebinde boldy. Men ony mektepke 13:30-da apardym, al saǵat 14:00-de alyp ketýimdi surady. Denesin kishkene jaraqattap aldy degen soń úlken ulymdy jiberdim. Ózim jumysta, áıelim balamen úıde boldy. Qanǵa malynǵan balany kórgen kezde áıelim jedel járdemge habarlasyp, meni shaqyrdy. Úıge kelip, oblystyq balalar aýrýhanasyna jetkizdim. Keıin mektepke de bardym. Synyp jetekshisi men sharýashylyq jónindegi meńgerýshi qatty bekitilmegen soń shkaf qulaǵanyn aıtty. Mekteptegi medbıke balama alǵashqy kómekti kórsetpegen», - dep jazdy oqýshynyń ákesi Qanat Taılanov áleýmettik jelide.
Alǵa aýdany, Bestamaq orta mektebiniń ujymy balanyń ata-anasynan keshirim suraǵanyn, oqıǵanyń qalaı bolǵanyn aıtyp berdi.
«Oqýshy mektep aldy daıarlyq tobynda oqıdy. Tárbıeshi balalardy qabyldap, sheshindigip jatqan edi. Sol kezde Ibrahım shkaftyń esigimen oınap turyp, basyn qatty soǵyp alǵan. Al shkaftyń qulaýy múmkin emes. Ernin tistep alǵan, dárigerlerge tiktirgen eken. Beti isip ketedi dep oılaǵan joqpyz. Birden úıine jiberdik», - dedi dırektor Anar Istegýlova.
