Aqtóbe mektebinde ınklıýzıvti bilim beretin resýrstyq kabınet ashyldy
AQTÓBE. QazAqparat - Aqtóbede alǵash ret mektep ishinen ınklıýzıvti bilim beretin resýrstyq kabınet ashyldy. Aldaǵy ýaqytta mundaı kabınetterdi aýdan ortalyqtarynan ashý josparlandy, dep habarlaıdy QazAqparat tilshisi.
Aqtóbe mektepterinde bilim alyp júrgen múmkindigi shekteýli balalar endi sabaqtan tys ýaqytta, qosymsha júktelgende arnaıy ınklıýzıvti kabınetke bara alady. Munda logoped, psıhologtar jumys isteıdi. Endi múmkindigi shekteýli balalar óz qurby-qudastarymen bir partada oqyp, túsinbegen, ıgermegen baǵdarlamalaryn jeke oqı alady.
«Aqtóbe oblysynda erekshe qajettiligi bar 5 600-den astam bala bar. Ótken jyly erekshe balalardy oqytýǵa arnalǵan resýrstyq kabınet ashýdy qolǵa alyp, bıyl 4 mektepte paıdalanýǵa beriledi. Jospar boıynsha barlyq aýdanda kabınet bolady. Bári demeýshilerge, qarjyǵa baılanysty. Kabınette ata-analarǵa keńes berý, múmkindigi shekteýli balalarmen arnaıy mamandardyń jumys isteýine jaǵdaı jasalǵan»,- dedi Aqtóbe oblystyq bilim basqarmasynyń bólim basshysy Qaırat Aldajarov.
Aıta keteıik, qazirgi kezde 24 arnaıy synypta 114 bala oqıdy. Al 1170 oqýshy ınklıýzıvti synypta bilim alyp júr.
«Kez kelgen bala ózi qalaǵan mektebine baryp bilim alýy úshin jaǵdaı jasaýymyz kerek. Bizdiń mindetimiz - barlyq mektepti, muǵalimdi erekshe qajettiligi bar balalardy qabyldaýǵa úıretý. Korrektsııalyq mektepterge qarsy emespiz, biraq ár bala qurby-qurdastarynyń janynda bolyp, solarǵa umtylýy kerek. Bala sabaqqa keledi, eger qosymsha túsindirýler qajet bolsa, resýrstyq kabınettiń kómegine júginedi. Keıbiri sabaqqa tolyq qatysa almaıdy, ondaıda mamandar kómektesedi»,- «Dara» qorynyń úılestirýshisi Maral Sheshembekova.
Qazirgi kezde mektepterge pandýs salý, balalardyń mektep ishinde óz erkimen qozǵalýyna jaǵdaı jasaý jaǵy qarastyrylyp jatyr. Sebebi, Aqtóbe mektepterine pandýs salý jumysy áli aıaqtalǵan joq.
