Aqtóbe medıtsınasynyń ardagerleri marapattaldy
AQTÓBE. QazAqparat –Aqtóbe qalasynyń 150 jyldyǵy aıasynda medıtsına salasyna eńbegi sińgen densaýlyq saqtaý salasynyń ardagerleri marapattaldy, dep habarlaıdy QazAqparat tilshisi.
Aqtóbe oblystyq densaýlyq saqtaý basqarmasy, «Senim» densaýlyq saqtaý salasynyń kásipodaq uıymy qalanyń 150 jyldyǵynda medıtsına salasynyń qyzmetkerlerin marapattaldy. Uzaq jyldar boıy adam emdep, dertine shıpa bergen dárigerlerdiń keıbiri zeınet demalysynda bolsa, keıbiri áli de jas býynǵa tálimger bolyp júr. Oblystyq densaýlyq saqtaý basqarmasynyń basshysy Áset Qalıev ardagerlerge alǵysyn aıtyp, óńirdegi medıtsına tarıhyna, qıyn kezeńder men jetistikter týraly oı bólisti.
«Zemstvolyq basqarý kezinde ár aǵash úıden 2 rýblden jınalǵan. 1878 jyly Aq-Tóbe bekinisinde 1 myń adam turyp, onda áskerıler medıtsınalyq kómek kórsetip, eki zemstvolyq feldsher jumys istedi. Ol kezde kóshpendiler arasyndaǵy juqpaly aýrýmen kúres jumystary júrip, ekpe jasaldy. Dári-dármek az, oǵan jylyna tek 200 rýbl jumsaldy. Jaǵdaıy asa aýyr adamdar áskerı lazaretke nemese Іshki orda men Orynbor gýbernııasyna jiberildi. Qalada dáriger bolmady, áskerı dáriger óte sırek kórmek kórsetken. Sondyqtan adamdar, onyń ishinde balalar arasynda ólim kóp tirkeldi. Dárigerler arasynda Buhara, Samarqandtaǵy medreseni oqyǵandar boldy. Ári shóppen emdegender, synyqshylar, mal maıymen em jasaǵandar, tuz ben qumǵa túsý, qobyz únimen shıpa berýshiler boldy. Munyń bári halyq sanynyń ósimine keri áserin tıgizdi. 1885-1895 jyldary halyq sany bar bolǵany 1,5 myń adamǵa ósti», - dep tarıhqa toqtaldy Áset Qalıev.
Tarıhı derekti jalǵastyrsaq, 1899 jyly alǵash ret óńirde dárigerlik ýchaskege bóline bastaǵan. Qalada alǵash ret medıtsınalyq bilimi bar dáriger jumys istedi. Ábýbákir Aldııarovtyń esimi de osy tusta atalýy tıis. Al 1900 jyly Aqtóbede bes kereýettik qabyldaý bólmesi ashylyp, Orynbor-Tashkent temirjoly salynǵan tusta halyq sany óse bastady. Al 1902 jyly alǵashqy dárihana ashyldy. 1907 jyly dárigerlik pýnkt ashylyp, eki qabatty ǵımarat qoldanysqa berildi.
«1912 jyly birinshi qalalyq aýrýhana ashylyp, 1915 jyly temirjol aýrýhanasy qoldanysqa berildi. Sol ýaqytta Aqtóbe qalasynda bes dáriger, alty feldsher, bir tis dáriger men bir farmatsevt jumys istegen. 1924 jyly respýblıkada alǵash ret teri-venerologııalyq dıspanser, 30 kereýettik balalar aýrýhanasy ashyldy. Jyl ótken saıyn medıtsına damyp, 1930 jyly medıtsınalyq mektep ashyldy. Ekinshi dúnıejúzilik soǵys jyldary áskerı gospıtal jumys istep, 1941 jyly Ýkraınadan «Shaǵala» balalar týberkýlezinen emdeý shıpajaıy kóshirildi. Jyl ótken saıyn medıtsına damı tústi. Al táýelsizdik jyldary Aqtóbe qalasy men qala mańynda 27 qalalyq medıtsınalyq nysan salyndy. Onyń toǵyzy memlekettik emes sektor», - dedi oblystyq densaýlyq saqtaý basqarmasynyń basshysy Áset Qalıev.
Qazir Aqtóbe oblysy medıtsınalyq ortalyqqa aınaldy. Qazaqstannyń batys óńirimen qatar kórshiles Reseı elinen kelip, em alýshylar bar. Tehnıkalyq bazasy damyp, dárigerler shetelde tájirıbe jınap jatyr. Munyń bári Aqtóbe medıtsınalyq ortalyǵynda ashylǵan mýzeıde kórinis tapqan.
Aıta keteıik, aqtóbelik ardagerler arnaıy merekelik medalmen jáne baǵaly syılyqpen marapattaldy. Ardagerlerdi oblys ákiminiń orynbasary Marat Toǵjanov, qala ákimi Mavr Abdýllın de quttyqtady.
