Aqtóbe medıtsınalyq kolledjine Mánshúk Mámetovanyń aty berildi
AQTÓBE. QazAqparat - Aqtóbe medıtsınalyq kolledjine Keńes Odaǵynyń batyry Mánshúk Mámetovanyń aty berildi. Bul usynysty burynǵy dırektory Vadım ıÝgaı on jyl buryn Úkimetke joldaǵan bolatyn, dep habarlaıdy QazAqparat tilshisi.
Aqtóbe óńirindegi kishi medıtsına qyzmetkerlerin daıyndaıtyn medıtsınalyq kolledjdiń burynǵy dırektory Vadım ıÝgaı 2006 jyly Úkimetke medıtsınalyq kolledjdi Mánshúk Mámetovanyń atymen ataýdy usyndy. Biraq bul usynys qoldaý tappaı, kolledjdi on jyldan astam ýaqyt boıy basqarǵan V.ıÝgaı dúnıeden ozdy. Al taıaýda Úkimet basshysy Baqytjan Saǵyntaev buıryqqa qol qoıyp, Mánshúk Mámetova aty medıtsınalyq kolledjge berildi.
«Medıtsına ǵylymdarynyń kandıdaty, densaýlyq saqtaý salasynyń úzdigi Vadım ıÝgaı on jyl buryn bastama kóterip, usynys tastady. Sol jyly Keńes Odaǵynyń batyry Mánshúk Mámetovaǵa arnap kolledjde arnaıy murajaı ashyldy. Biraq bul usynys osy jyldyń mamyrynda qoldaý tapty, qaýly shyqty. S. Asfendııarov atyndaǵy medıtsınalyq ýnıversıtette oqyp, soǵysqa suranyp barǵan qazaq qyzynyń erligi jas mamandarǵa úlgi-ónege bolady. Bizdiń stýdentter Mánshúk Mámetovanyń atyna kir keltirmeý úshin bar kúshin salady»,- dedi Aqtóbe medıtsınalyq kolledji dırektorynyń orynbasary Samal Tájibaeva.
Aqtóbe medıtsınalyq kolledjinde 1500-den astam stýdent bar. Munda medbıkeler, stomatologtar, feldsherler daıyndalady. Búgin bul kolledjde úzdik pedagog pen úzdik stýdent tańdaldy.
