Aqtóbe mańynda «altyn saqa» tabylǵan jer əli zerttelmeı jatyr
AQTÓBE. QazAqparat - Aqtóbedegi Baıǵanın óńirinen eki ret «altyn saqa» tabylǵan jer áli kúnge deıin zerttelmeı keledi, dep habarlaıdy QazAqparat tilshisi.
Aqtóbedegi aýyl, aýdan mýzeıi qundy jádigerge toly. Máselen, Baıǵanın aýdanynda eki ret «altyn saqa» tabyldy. Alaıda eki saqa tabylǵan jer áli kúnge deıin zerttelmegen, qazba jumystary júrgizilmegen.
«Baıǵanın óńirinen eki ret «altyn saqa» tabyldy. Aýdandaǵy Tórtkúl degen jerge mal jaıýǵa shyqqan baqtashy qyr basynda erekshe jyltyr dúnıeni kórgen. Eshteńe bilmegen malshy sáýir aıynda áli tońy ketpegen jerdi sál túrip, «altyn saqa» tapty. Keıin saqany Mádenıet qaıratketi Rysjan Іlııasova, tarıhshy Bısen Jaqanov saraptamadan ótkizýge jiberdi. Qorytyndy tań qaldyrdy. Saqa bes metaldan quıylǵan, quramynda qorǵasyn, temir, kúmis bolǵan, sary myspen qaptalǵan. Mýzeıge kelgen adamdarǵa saqa tarıhyn «Altyn saqa» ertegisimen baılanystyryp aıtamyz. Ókinishtisi, bireýi de jergilikti jerde saqtalmady»,- dedi Baıǵanın aýdandyq mýzeıiniń dırektory Lázzat Jaýlına.
Mýzeı dırektory aldaǵy ýaqytta saqa tabylǵan jerdi zerttep, saqanyń qalyby men jasalý tehnologııasy tabýǵa múmkindik bar ekenin aıtyp otyr. Sebebi, ǵalymdar saqa tabylǵan aýmaqqa qazyq qaǵyp, belgilep qoıǵan. Ázirge zertteý, qazba jumystary bastalmady.
Sonymen qatar, Baıǵanın aýdandyq mýzeıinde Baraq batyrdyń naızasynyń ushy saqtaýly. Kishi júzdiń tabyn rýynan shyqqan batyr elin, jerin naızanyń ushymen, bilektiń kúshimen qorǵaǵan.
«Naızanyń ushy 57 jyl boıy urpaqtan urpaqqa berilip, saqtalyp keldi. Keıin mýzeı ashylǵanda Jámeńke ata tapsyrdy. Shyn máninde naızanyń ushyn saqtaý da óte qaýipti bolǵan. Jámeńke ata saıası-qýǵyn súrgin ýaqytynda mundaı dúnıelerdi saqtaý qaýipti bolǵan, únemi qorqynyshpen, úreımen ómir súrgenin aıtyp, amanat etti. Mýzeıge eń aldymen berilgen qundy jádigerimiz osy. Sam eldi mekeninde Baraq batyrdyń kesenesi turǵyzylǵan. Keıin ol jerde meshit ashyldy. Túnemeli úıine barǵan kezde aǵash tabaq pen quman kórdik. Túnemelik úıdiń shyraqshysy, Baraq batyrdyń urpaǵy aǵash tabaqtyń sol zamanda paıdalanylǵan buıym ekenin aıtty. Al quman Baraq batyrdyń uly Asaý batyrdyń zamanynda paıdalanylǵan. Ótinishpen mýzeıge surap aldyq. Alý óte qıyn boldy», - dedi Lázzat Jaýlına.
Mýzeıde súıekpen kómkerilgen dombyra, sandyq bar. Sonymen qatar, jıde aǵashynyń ortasyn oıyp jasaǵan 100 jyldyq tarıhy bar dombyra da saqtaýly. Ony Baraq batyrdyń urpaqtary tapsyrǵan.
«Aqyn, sazger, dramatýrg Bákir Tájibaevtyń dombyrasyn urpaqtary tapsyrdy. Ózi án aıtqan dombyrasy men úntaspasy bizdiń mýzeıge berilgen qundy jádigerler qataryna qosyldy»,- dedi mýzeı dırektory.
Aıta keteıik, mýzeıde 10 qozynyń terisinen ılenip tigilgen seńsen ton bar. Tondy tulǵaly jigitter kıgen. Syrty tomar boıaýmen boıalǵan. Ystyqtan, sýyqtan da qorǵaıdy.
