Aqtóbe mańy turǵyndaryna jer ýchaskeleri beriledi
ASTANA. QazAqparat - Qurashasaı aýylyndaǵy jańa mekteptiń akt zalynda Aqtóbe qalasynyń ákimi Bekbol Saǵynmen kezdesý úshin aýyl turǵyndary kóp jınaldy.
Bul týraly «Aqtóbe» gazetinen habarlandy.
Novyı aýyldyq okrýginiń aýmaǵynda ornalasqan Qurashasaı aýylynyń turǵyndarymen kezdesýge qala ákimimen birge qalalyq máslıhat hatshysy Sulýpan Shyntasova, saıası keńes jáne «Nur Otan» partııasynyń Aqtóbe qalalyq fılıalynyń qoǵamdyq qabyldaýynyń qyzmetkerleri de keldi.
Áýeli sóz bastaǵan Aqtóbe qalasynyń ákimi kezdesýdiń maqsaty men mindetterine toqtaldy. Sondaı-aq, «100 naqty qadam» Ult josparynyń, 5 ınstıtýtsıonaldyq reformanyń júzege asyrylý barysy týraly aqparat berý jáne jer máselesine qatysty túsindirý jumystaryn júrgizýdi maqsat etken kezdesý bılik ókilderi men partııalyqtardyń turǵyndarmen ashyq dıalog júrgizýdi kózdeıtinin aıtty.
Turǵyndardy alańdatatyn máselelerdiń eshqaısysy nazardan tys qalmaýy tıis. Kezdesýge kelgen aýyl turǵyndary óz suraqtaryna jaýap alý úshin berilgen múmkindikti múlt jibermedi. Kezdesý barysynda jalpy aýylǵa qatysty máselelermen qatar, jeke turǵydaǵy suraqtar da qoıyldy. Qala ákimi turǵyn úı alý kezeginde turǵan ardagerge úı kezek tártibimen beriletindigin túsindirdi.
Jeke turǵyn úı qurylysy úshin beriletin jer ýchaskeleri bıyl 2005 jyly kezekke turǵan azamattarǵa Shıelisaı-2, Krasnoselskoe-2, Aqshat-2 turǵyn massıvterinen beriletini aıtyldy. Qalǵan kezekke turýshylar turǵyn massıvteriniń daıyn bolýyna, ıaǵnı naqty josparlaý jobalaryn ázirleý jáne ınjenerlik jelilerdiń qurylysyna baılanysty beriletin bolady. Novyı aýyldyq okrýginiń ákimi turǵyndardyń jaıylymdar tapshylyǵy boıynsha suraqtaryna jaýap berdi.
Kezdesý barysynda «Qanaǵat» jańa turǵyn massıviniń turǵyndaryna bıyl sý qubyryn, elektr jáne gaz jelileriniń qurylysyn júrgizý úshin jobalaý-smetalyq qujattama ázirleý jumystary júrgiziletindigin aıtyp, ýáde berdi.
Turǵyn úı-kommýnaldyq sharýashylyǵy bólimi basshysynyń málimdeýinshe, osy jyldyń tamyz aıynda jaryqtandyrý tirekteri men shamdar ornalasqan kóshelerde jaryq júrgizý josparlanyp otyr.
Sondaı-aq, jol jóndeý máselesi de kóterildi. Ázirlengen jobalaý-smetalyq qujattama memlekettik saraptamaǵa jiberiledi, al jóndeý jumystary qarjylandyrý merzimine baılanysty júrgiziletin bolady.
Qoǵamdyq kólik jumysy turǵysyndaǵy suraqtarǵa «Avtopark» JShS ókili jaýap berip, aýyl turǵyndarynyń barlyq shaǵymdary baqylaýǵa alynatyndyǵyn málimdedi.
Kezdesýge qatysýshylarǵa burynǵy mektep ǵımaratyn paıdalaný máselesi túsindirildi. Mekteptiń jańa ǵımaraty paıdalanýǵa berilgennen keıin mekteptiń eski ǵımaratynda balabaqsha ornalastyrý josparlandy. Biraq 1943 jyly turǵyzylǵan ǵımarat paıdalaný merziminiń ótýine baılanysty balalar mekemesi retinde paıdalanyla almaıdy. Búginde ol - kommýnaldyq menshikte, degenmen jaqyn arada ony satý úshin ashyq konkýrs júrgiziletin bolady.
Іs-sharany qorytyndylaı kele, Bekbol Saǵyn mundaı kezdesýlerdiń joǵary nátıje beretindigin, eldi mekenderdi odan ári damytý boıynsha qalalyq baǵdarlamalardy ázirleý úshin turǵyndardyń pikirin eskerý mańyzdylyǵyn atap kórsetti. Sonymen qatar, qala basshysy Qurashasaı aýylynyń turǵyndary kóterilgen máseleler boıynsha birqatar tapsyrmalar berdi.
A.BALJANAI.
