Aqtóbe-Laetı qalasynyń qupııalary ashylmaq
ATYRAÝ. QazAqparat - Atyraý aýmaǵynda ornalasqan Aqtóbe-Laetı eski qalashyǵynda qaıta zertteý jumystary júrgizile bastady. Kóne mekende kóp jyldan beri qazba jumystary júrgizilmegen, dep habarlaıdy QazAqparat tilshisi.
Jýyrda qazba jumystary kezinde mamandar kóne qala ornynan qysh ydystar men mys tıyndar oljalady.
«Arheologtardyń joly boldy. Qazba jumystaryn júrgizgen alǵashqy kúni qyzmetkerler bútin óndiristik keshenge tap boldy. Eski qala ornynan qysh ydystar men mys tıyndar tabyldy. Bul bizdiń babalarymyzdyń tarıhy. Bizde nomadtardyń, sarmattardyń órkenıetin tek kóshpendilikpen ǵana baılanystyratyn túsinik bar. Al shyn máninde olar otyryqshy bolǵan, onda qolóner óte joǵary deńgeıde damyǵan. Ony Aqtóbe-Laetı ornynan tabylǵan kóne jádigerler dáleldep otyr», - dedi belgili atyraýlyq ǵalym-arheolog Marat Hasenov. 
Qalashyq arnaıy qorshaýǵa alynyp, bolashaqta Aqtóbe-Laetı ortaǵasyrlyq qalasy ornynan aspan asty mýzeı-qoryǵy turǵyzylmaq kórinedi.
Tarıhshylar Uly Jibek jolynyń boıynda saýda kerýenderine arnalǵan «Aqtóbe-Laetı» qalashyǵynyń ornalasqany jóninde 1960 jyldan beri aıta bastady.
Munda 1965 jyly Sh.Ýálıhanov atyndaǵy tarıh-arheologııa jáne etnografııa ınstıtýynyń ǵylymı qyzmetkerleri alǵashqy bolyp arheologııalyq barlaý jumystaryn júrgizip, qalashyq eki qorǵan eskertkishten turatyndyǵyn anyqtaǵan. Qalashyqta júıeli túrdegi qazba jumystaryn Lev Galkın jetekshilik etken KSRO ǵylym Akademııasynyń Arheologııa Instıtýtynyń Oral-Edil boıy ekspedıtsııasy 1974 jyly bastap, 1981 jylǵa deıin júrgizgen. 
Ol qazba ornynyń 200h80 metr aýmaǵy zerttelgen. Sol kezde tabylǵan dúnıelerge qarap, qalada túrli metall óńdeıtin oryndar, áınek, zergerlik buıymdar jasaıtyn sheberhanalar bolǵanyn aıtýǵa bolady. Odan bólek, munda Irannyń Shıraz qalasynda soǵylǵan tıyndar tabylǵan.
«Búginde kóne qalada qazba jumystary júrip jatyr. Qazba ornynda qysh ydystardyń synyǵy, metall qorytpalarynyń qaldyǵy, monshaqtar jáne jazýy saqtalmaǵan mys tıyndar tabyldy, - deıdi M. Hasenov.
