Altyn Orda dáýirine tán sırek kezdesetin kóne kúmis tıyndar tabyldy
AQTÓBE. KAZINFORM — H.Dosmuhamedov atyndaǵy Atyraý ýnıversıtetiniń arheologtary qazba jumystary barysynda orta ǵasyrǵa tán kóne kúmis tıyndar tapty. Arheologııalyq qazba Atyraý qalasy mańyndaǵy «Aqtóbe-Laetı» qalashyǵyna júrgizilgen. Bul týraly Ǵylym jáne joǵary bilim mınıstrligi málim etti.
Kóne tıyn Joshy Ulysynda qurylǵan Altyn Orda memleketiniń bıleýshisi Meńgý-Temir han tusynda quıylǵan aqshalar tobyna jatady. Reseılik nýmızmatıka professory monetanyń bederli tańbalaryn oqyp, qundylyǵyn asa joǵary baǵalaǵan.
— Bul tıyndar belgili nýmızmatık ǵalym Pavel Nıkolaevıch Petrovtyń paıymdaýynsha HІІІ ǵasyrdyń ekinshi jartysyna sáıkes keledi. Quıma aqshanyń bir betinde Meńgý-Temir hannyń tańbalary, ekinshi jaǵynda Qytaı ıeroglıfteri beınelengen. Onyń sebebi Shyńǵyshannan taraǵan Qubylaı urpaqtary men Shaǵataı ulysy arasynda qaqtyǵystarda qolǵa túsken saıası tutqyn Nomýhanmen baılanystyrady, — deıdi arheolog Amangeldi Muǵaýuly.
Sonymen qatar arheolog qazbadan taǵy kórnekti artefakt «Taǵara» ydysy da bútin kúıinde tabylǵanyn aıtady.
— Bıyl tarıhı qalashyqty qazýǵa Atyraý oblystyq tarıhı-mádenı muralardy zertteý ortalyǵy tapsyrys bergen. «Sońǵy eki-úsh jyldyqta bul jerge erekshe kóńil bólip jatyrmyz. Qalashyqtyń 53 gektar aýmaǵy tolyqtaı qorshaldy. Bolashaqta ashyq aspan astyndaǵy mýzeıge aınaldyrýdy josparlap otyrmyz, — deıdi oblystyq tarıhı-mádenı muralardy zertteý ortalyǵynyń basshysy Tolybaı Dostybaev.
Arheologııalyq zertteýge Atyraý ýnıversıtetiniń tarıhshy mamandyǵynda oqıtyn stýdentter de qatysqan. Búginde kóne qalashyqtyń 500 sharshy metr aýmaǵynan arshyp alǵan artefaktiler oqý ordasynyń zerthanasynda tereń zertteledi dep josparlanyp otyr.
Eske sala keteıik, buǵan deıin arheologııa jáne qazba jumystarymen 20 jyldan astam aınalysyp júrgen Álkeı Marǵulan atyndaǵy arheologııa ınstıtýty Erte metall arheologııa bóliminiń basshysy, Phd, aǵa ǵylymı qyzmetker ári trasolog Albına Erjanova zamaýanı arheologııa men ondaǵy áıelderdiń orny týraly aıtyp bergen edi. Tolyǵyraq myna siltemeden oqı alasyz.