«Aqtóbe» Konferentsııa lıgasyn ekinshi irikteý kezeńinde aıaqtady

ASTANA. KAZINFORM - Qazaqstandyq «Aqtóbe» UEFA Konferentsııa lıgasy ekinshi irikteý kezeńinde Chehııanyń «Sparta» komandasyna jeńilip qaldy.

Eki komanda arasyndaǵy alǵashqy oıynda aqtóbelik klýb qarsylasynan 2:1 esebimen basym túsken edi. 

Sondyqtan qazaqstandyq jankúıerler olar qarymta kezdesýde qajetti nátıjege qol jetkizip, jarysty jalǵastyratynyna úmit artty.

Degenmen búgingi matchta chehııalyq klýb alǵashqy mınýttan tizgindi óz qolynda ustaýǵa tyrysty. Dese de birinshi kezeńde olarǵa aqtóbelik fýtbolshylar laıyqty tótep bere bildi. 

Ekinshi kezeńde «Sparta» kóbirek shabýylǵa ıek artty. Nátıjesinde olardyń qatarynan Velko Bırmanchevıch 57-mınýtta gol soqsa, Mateı Rınesh 60-mınýtta kózdegen nysanadan múlt ketken joq. 

Al chehııalyq klýbtan ıAn Kýhta 64, Albıon Rahmanı 94-mınýtta basymdyqty taǵy eki golǵa arttyrdy.

Osylaısha «Aqtóbe» qarsylasyna 0:4 esebimen jeńilip, jarysty erte aıaqtaýǵa májbúr boldy.
«Aqtóbe» eýrokýbok oıyndaryn Eýropa lıgasy birinshi irikteý kezeńinen bastap, bul joly Polshanyń «Legııa» komandasyna (0:1, 0:1) esebimen jol berdi.

Sondaı-aq shymkenttik «Ordabasy» fýtbol komandasy UEFA Konferentsııa lıgasy birinshi irikteý kezeńinde Grýzııanyń «Torpedo» (Kýtaısı) klýbyna (3:4, 1:1) jol berdi.

Aıta ketsek, búgin elordalyq klýb ekinshi irikteý kezeńinde Moldovanyń «Zımbrý» komandasyn (1:1, 2:0) qapy qaldyryp, jarysty jalǵastyrýǵa múmkindik aldy. 

Eske salsaq, almatylyq «Qaırat» fýtbol komandasy UEFA Chempıondar lıgasy ekinshi irikteý kezeńinde Fınlıandııanyń KýPS komandasyn (3:0, 0:2) jeńip, jarystyń úshinshi kezeńine joldama aldy.