Aqtóbe kóktemgi sý tasqynyna qarsy jumystarǵa 450 mıllıon teńge jumsaıdy

AQTÓBE. QazAqparat - Aqtóbede kóktemgi sý tasqynynyń aldyn-alý jumystary júrgizilip jatyr. Bıyl 450 mıllıon teńge bólindi. Arnaıy shtab túni boıy sý toǵandaryn kúzetýge kóshti, dep habarlaıdy QazAqparat tilshisi.

Aqtóbe qalasyna sý tasý qaýpi tónip turǵan joq. Sý tasqynyna qarsy shtab tótenshe jaǵdaıdyń aldyn-alý kezinde 100-den astam turǵyn úı men 20 saıajaı ujymynda sý sorý, aǵyn sýdyń arnasyn burý jumystaryn júrgizdi. 

«Bıýdjet qarjysyn únemdeý maqsatynda arnaıy tehnıkalarǵa JPS-navıgatorlar qondyryldy. Sonymen qatar, 4 myń tonna ınertti materıal, 2000 dana qum toltyrylǵan qapshyq daıyndaldy. Qala aýmaǵyndaǵy gıdrotehnıkalyq qurylystar men bógetterdiń jaǵdaıy baqylaýda. Sý tasqynyna qarsy shtabqa 1 myńǵa jýyq qońyraý tústi. Qala aýmaǵynan 75 myń tekshe metr sý sorylyp, 1034 tonna ınertti materıal jumsaldy»,- dedi qala ákiminiń orynbasary Naǵymjan Aldııarov. Onyń aıtýynsha, halyqty evakýatsııalaıtyndaı jaǵdaı bolsa, 4 mektep arnaıy daıyndalǵan. 

Aıta keteıik, bıyl Aqtóbede sýaǵarlar qurylysy bastalady. Ótken jyly bir obekt boıynsha jeńimpaz anyqtaldy. Biraq qys túsip, sýaǵar qurylysy toqtatyldy. Kóktem kele jumys qaıta qolǵa alynyp, 12 nysandy jobalaýǵa taǵy 100 mıllıon teńge bólindi.