Aqtóbe: Qobda aýdanynyń ortalyǵyndaǵy úılerdi sý basty
AQTÓBE. KAZINFORM – Aqtóbe oblysy Qobda aýdanynyń ortalyǵynda úılerdi sý basty. Qazir turǵyndardy evakýatsııalaý jumysy júrip jatyr.
Aqtóbe oblysy Qobda aýdanynyń ortalyǵy bıyl da sýǵa ketti. Qazirgi kezde onda qutqarý jumystary júrip jatyr.
- Qobdada Mańǵystaý oblysynan kelgen 52 qutqarý jasaǵy bar. Olar Temir aýdanynan sonda jiberildi. Qazir sýǵa ketken úılerdiń sany eseptelip jatyr. Tańerteńgi aqparat boıynsha 100-den astam adam evakýatsııalandy. Sonymen birge Oıyl aýdanynda da Oıyl ózeni arnasynan shyǵýy múmkin degen qaýip bar. Zerdeleý jumysy júrgizilip jatyr. Túste áýeden baqylaý júrgiziledi, - dedi Aqtóbe oblystyq TJD bastyǵy Nurǵalı Júnisov.
Aıta keteıik, óńirde 300-ge jýyq adam evakýatsııalanǵan. Kóbi týma-týystarynyń úıin panalaýdy jón kórgen. Aqtóbe qalasyndaǵy evakýatsııalyq pýnktte ázirge adamdar joq.
Eske salsaq, byltyr Qobda aýdanynda úıler sýǵa ketip, aýdandyq deńgeıde tótenshe jaǵdaı jarııalandy.