Aqtóbe, Qyzylorda jáne Jetisý oblystarynda jol qozǵalysy ýaqytsha shekteldi
ASTANA. KAZINFORM – 29 jeltoqsan kúni saǵat 19:30-dan bastap aýa raıynyń buzylýyna baılanysty respýblıkalyq mańyzy bar birqatar avtojoldarda júk jáne qoǵamdyq kólik túrleriniń qozǵalysyna ýaqytsha shekteý engiziledi.
Aqtóbe oblysynda «RF shekarasy – Mártók – Aqtóbe – Qarabutaq – Qyzylorda – Shymkent – Taraz – Qordaı – Almaty – Qorǵas – QHR shekarasy» avtomobıl jolynyń 776-1240 shaqyrym aralyǵyndaǵy ýchaskesinde, ıaǵnı «EKO oıl» janarmaı quıý stantsııasynan Qyzylorda oblysynyń shekarasyna deıin qozǵalys shekteledi.
Qyzylorda oblysynda atalǵan avtojoldyń 1240-1362 shaqyrym aralyǵynda, Aqtóbe oblysynyń shekarasynan Aral qalasyna deıin júk jáne qoǵamdyq kólik qozǵalysyna ýaqytsha tyıym salynady.
Jol qozǵalysyn 2025 jylǵy 30 jeltoqsan saǵat 08:00-de qaıta ashý josparlanǵan.
Sonymen qatar 2025 jylǵy 29 jeltoqsan saǵat 18:00-degi jaǵdaı boıynsha aýa raıynyń qolaısyzdyǵyna baılanysty Jetisý oblysynda respýblıkalyq mańyzy bar bir avtojolda kólik qozǵalysyna shekteý qoıylǵan. Atap aıtqanda, «Úsharal – Dostyq» avtojolynyń 84-164 shaqyrym aralyǵynda, Kóktuma aýyly men Dostyq stantsııasy baǵytynda qozǵalys ýaqytsha toqtatylǵan.
- Qazirgi ýaqytta respýblıkalyq mańyzy bar avtojoldardy kútip-ustaý jáne qaýipsizdikti qamtamasyz etý maqsatynda 765 arnaıy tehnıka jumyldyrylǵan, - dep jazdy QazAvtoJoldan.
Joldaǵy ahýal týraly qosymsha aqparatty táýlik boıy 1403 baılanys ortalyǵyna habarlasý arqyly alýǵa bolady.
Aıta keteıik, aqmolalyq polıtseıler jolda qalǵan sheteldikterge der kezinde kómek kórsetti.
