Aqtóbe kásipkerleri kıik ushasyn qabyldaýǵa daıyn emes
Aqtóbedegi kásipkerler kıik ushasyn qabyldap, satýǵa kelisim jasaǵanymen, oǵan áli daıyn emes. Tipti qujat rásimdeý kezinde naqty talap joq ekenin aıtty, dep habarlaıdy Kazinform.
BQO-dan Aqtóbege 800-den astam kıik ushasy ákelinip, bir kúnnen soń bári keri qaıtarylǵany belgili.
Aqtóbe oblystyq orman sharýashylyǵy jáne janýarlar dúnıesi aýmaqtyq ınspektsııasynyń bas mamany Qýanysh Demegenovtiń aıtýynsha, kıik ushasy 8-qarasha kúni KamAZ júk kóligimen jetkizilgen. Kelisim boıynsha “Dala eli” JShS-i men “Qasymov” JK qabyldap, ótkizýi tıis edi.
- Bul jerde et kombınaty men jeke tulǵa arasynda kelisim jasalǵan. Onyń qujattary daıyn emes. Basqa et kombınatyna baryp, baǵasymen kelise almaı, keri qaraı alyp ketti. Shynyn aıtqanda qabyldaýǵa kelisken et kombınatynyń qurylysy bitpegen. Veterınarlyq talapqa daıyn bolmaı shyqty. Keıin "Aıbek" óndiristi kooperatıvine aparǵan. Kásipker bir-birimen kelise almady,- dedi Aqtóbe oblystyq orman sharýashylyǵy jáne janýarlar dúnıesi aýmaqtyq ınspektsııasynyń bas mamany Qýanysh Demegenov.
Ol kıik ushasy rásýa bolmady, júk kóliniń salqyndatqyshy bar dep aıtty. Al "baǵasyn kelise almady" degen "Aıbek" aýyl sharýashylyǵy óndiristik kooperatıviniń basshysy qujaty durys bolmaǵanyn aıtty.
- Biz kıikti qabyldamadyq. Eshqandaı qujaty daıyn emes. Teri, veterınarııa ınspektsııasy bizge qujat berýi kerek. Tiri malǵa Forma-1 degen anyqtama bolady. Bul jerde de sondaı. Soıý úshin qandaı da bir negiz bolýy kerek. Atýǵa ruqsat berilgenimen, áli naqty qujaty joq. Olar qandaı qujat kórsetý kerek ekenin de bilmeımin. Bári zańdy bolýy úshin qandaı qujat kerek ekenin naqtylaý kerek. Usynys tústi. Bul mal soıý orny. Tek qyzmet kórsetemiz. Soıamyz, jýyp, tazartyp, qujatyn beremiz. Al etin satpaımyz. Aldaǵy ýaqytta jumys isteýge bolady. Tipti buqtyrylǵan et te daıyndaýǵa múmkindik bar,- dedi Aıbek Qaldyǵulov.
Aıta keteıik, kıik eti satylady degen mal soıý ornyna polıtsııa da barǵan. Oblystyq PD baspasóz qyzmetiniń habarlaýynsha, bul qoǵamdyq qaýipsizdikti qamtamasyz etý sharasy.
