Aqtóbe kásiporyndary bos oryndarǵa mamandar izdedi
AQTÓBE. QazAqparat - Aqtóbe qalasynda bos jumys oryndary jármeńkesi ótti, onda 500-ge jýyq vakansııa usynyldy, dep habarlaıdy QazAqparat tilshisi.
Astana kúnine oraı ótken jármeńkege óńirdegi kommýnaldyq kásiporyndar, qurylys kompanııalary men bilim berý mekemeleri qatysty. Kóbi tájirıbeli maman izdeıdi.
«Jumys berýshilerdiń deni túıindemeni alyp, «habarlasamyz» dep qaıtaryp jiberedi. Bos jumys oryndary jármeńkesine kelip, taǵy 5-6 mekemege túıindemeni qaldyrdym. Áıelderge jumys az. Kompanııalarǵa dánekerleýshi, temir ustasy sekildi jumysshy mamandar qajet. Men esepshi, kassır mamandyǵy boıynsha jumys izdep júrmin. Jalaqy da óte az. 25-35 myń teńge bizge jetpeıdi»,- dedi jumys izdeýshi Bıbigúl Súleımenova.
Aıta keteıik, qazir Aqtóbe qalasynda 1200-den astam jumyssyz bar. Jaz aılarynda olardyń qatary artady. Sebebi, joǵary, arnaýly orta oqý ornyn bitirgender dıplom alǵan soń birden eńbekke aralasa almaıdy.
«Jármeńke kezinde kompanııalar bos jumys oryndaryn usynyp, jumyssyzdarǵa qaıta daıarlaý kýrstary týraly málimet berildi. Jaz aılarynda áıelder jumyssyz otyrsa, qysta qurylys toqtap, er adamdar úıde otyryp qalady. Kóbine 45 jastan asqan azamattar eńbekke aralasa almaıdy. Bul jumys berýshilerdiń suranysyna baılanysty»,- dedi qalalyq jumyspen qamtý jáne áleýmettik baǵdarlamalar bóliminiń basshysy Neılá Bórtebaeva.
