Aqtóbe kásibı bilim boıynsha halyqaralyq dıalog alańyna aınaldy
AQTÓBE. KAZINFORM - Aqtóbede Memleket basshysynyń bastamasymen jarııalanǵan Jumysshy mamandyqtar jyly aıasynda «Bilim. Daǵdy. Bolashaq» halyqaralyq forýmy uıymdastyryldy.
Ol tehnıkalyq jáne kásiptik bilim berý júıesin damytýdyń ózekti máselelerin talqylaýǵa, halyqaralyq tájirıbeni zerdeleýge jáne eńbek naryǵynyń suranysyna saı básekege qabiletti jumysshy kadrlardy daıarlaýdyń tıimdi tetikterin ázirleýge arnalǵan mańyzdy dıalog alańyna aınaldy.
Forýmǵa Qytaı, Frantsııa, Japonııa, Germanııa, Belarýs jáne Ózbekstannan kelgen halyqaralyq sarapshylar, óńirdegi kolledj ókilderi, qoǵamdyq uıymdar jáne orta arnaýly oqý oryndarynyń áleýmettik seriktesteri qatysty.
Kúnniń alǵashqy jartysynda qatysýshylar Óner ortalyǵynyń foıesinde óńir kolledjderiniń jetistikter kórmesin aralap shyqty. Bilim berý uıymdary jańa jabdyqtar men zamanaýı oqý-óndiristik sheberhanalaryn tanystyrdy.
Al forýmdy Aqtóbe oblysy ákiminiń orynbasary Joldas Batyrhan jáne QR Oqý-aǵartý vıtse-mınıstri Shynar Aqparova ashyp, quttyqtaý sóz sóıledi. Jumysshy mamandyqtar jyly aıasynda jastardy eńbekke tartýǵa, kásibı baǵdar berýge jáne tehnıkalyq bilimge qyzyǵýshylyǵyn arttyrýǵa baǵyttalǵan birqatar is-shara ótkizilgen.
Forým barysynda sheteldik sarapshylar kásibı-tehnıkalyq bilim berýde zamanaýı tehnologııalardy engizý, oqytýshylardyń biliktiligin arttyrý jáne stýdentterdi eńbek naryǵyna ıntegratsııalaý tájirıbelerimen bólisti. Oqytýda jasandy ıntellektini qoldaný, kolledjderdi halyqaralyq akkredıtteý, eńbek naryǵynda suranysqa ıe kásibı daǵdylardy damytý jáne ekonomıkanyń qajettilikterine saı kadr daıarlaý baǵyttaryna basa nazar aýdaryldy.
Jıyn qorytyndysy retinde Aqtóbe óńirindegi kolledjder men sheteldik bilim berý uıymdary arasynda yntymaqtastyq týraly memorandýmdarǵa qol qoıyldy. Mańyzdy qujat tájirıbe almasý, halyqaralyq standarttardy engizý jáne birlesken jobalardy júzege asyrýǵa jańa múmkindikter ashary sózsiz.
Kúnniń ekinshi jartysy Jumysshy mamandyqtar jylyn qorytyndylaý jáne marapattaý sharasyna ulasty.
Saltanatty jıynda óńir basshysy Ashat Shaharov bir jyl ishinde atqarylǵan jumystarǵa, eńbek adamynyń mártebesin arttyrý jáne jumysshy mamandyqtardyń qoǵamdaǵy mańyzyn keńinen nasıhattaý máselelerine toqtaldy.
- Aqtóbe oblysynda Jumysshy mamandyqtar jyly aıasynda kolledjderdi damytý jáne suranysqa ıe mamandar daıarlaý baǵytynda aýqymdy jumystar atqaryldy. Búginde óńirdegi 40 kolledjde 28 myńnan astam stýdent bilim alyp, tehnıkalyq jáne tehnologııalyq baǵyttardy qosa alǵanda, zamanaýı mamandyqtardy meńgerip jatyr. Biz kolledjderdiń materıaldyq-tehnıkalyq bazasyn jańartyp, dýaldy oqytýdy engizip, pedagogterdiń biliktiligin arttyrýmen qatar, ozyq halyqaralyq tájirıbeni qoldanyp jatyrmyz. Jumysshy mamandyqtar jyly kásibı bilim berýdi damytýdaǵy mańyzdy qadam boldy. Árbir stýdent, pedagog jáne mamannyń eńbegi óńirimiz ben elimizdiń bolashaǵy úshin zor qundylyqqa ıe», – dep atap ótti Ashat Shaharov.
Bıyl aımaqta jumysshy mamandyqtar boıynsha memlekettik tapsyrys 7 407 orynǵa ornalastyryldy, bul aldyńǵy kórsetkishten eki ese kóp. Tórt orta arnaýly oqý ornynda – Servıs, sondaı-aq, Joǵary aýylsharýashylyq, Hromtaý taý-ken tehnıkalyq jáne Joǵary polıtehnıkalyq kolledjderde «Florıst-gúl ósirýshi», «Qonaqúı bıznesi», «Tamaqtandyrý salasynda qyzmet kórsetýdi uıymdastyrý» jáne «Marksheıderlik is» sııaqty jańa mamandyqtar ashyldy.
Joǵary polıtehnıkalyq kolledj janynan quny 1 mlrd teńgeni quraıtyn IT-hab salynyp jatyr. Kásibı baǵdar berý jumystarymen 48 myńnan astam oqýshy qamtylyp, 60 mektepte beıindi synyptar ashyldy. Bul balalardyń bolashaq mamandyǵyn erterek tańdaýyna septigin tıgizedi.
Sonymen qatar, eki kolledjde 500 mln teńgeden astam qarjyǵa kúrdeli jóndeý júrgizildi. Al Hromtaý joǵary taý-ken tehnıkalyq, Joǵary polıtehnıkalyq jáne Eýropalyq ekonomıka, bıznes jáne quqyq kolledjderi halyqaralyq akkredıtatsııadan ótti.
Resmı bólimnen keıin marapattaý rásimi ótti. Birqatar aqtóbelik aımaqtyń áleýmettik-ekonomıkalyq damýyna jáne kásiptik-tehnıkalyq bilim berýge qosqan úlesi úshin oblys ákiminiń Alǵys hatymen marapattaldy. «Zárý» pantomen emdeý shıpajaıynyń veterınar kómekshisi Mereke Amanqosov, «Aqtóbe asyl tuqymdy kásiporny» JShS veterınary Dýlat Myrzaǵalı, «Stepnoe» JShS qyzmetkeri Qýanysh Nuraly, «Vagonservıs» AQ tseh ınspektory Iklas Karın jáne basqa da eńbek adamdary ıe boldy.
«Ybyraı Altynsarın atyndaǵy» tósbelgi bilim berý salasynyń damýyna zor úles qosqan pedagogterge berildi. Olardyń qatarynda Joǵary Eýropalyq ekonomıka, bıznes jáne quqyq kolledjiniń quryltaıshysy Talǵat Tóremuratov, Aqtóbe oblystyq ádistemelik ortalyǵynyń dırektory Dına Jamanbaeva jáne Aqtóbe ónerkásiptik tehnologııalar kolledjiniń dırektory Tańjaryq Qydyrbaev bar.
Sondaı-aq bilim berý salasynyń birqatar Oqý-aǵartý mınıstrliginiń Qurmet gramotalary men Alǵys hattaryna ıe boldy.
Halyqaralyq forým men Jumysshy mamandyqtar jylynyń qorytyndylanýy halyqaralyq yntymaqtastyqty nyǵaıtýǵa, tájirıbe almasýǵa jáne óńirde bilikti kadrlar daıarlaýdyń turaqty júıesin qalyptastyrýǵa baǵyttalǵan mańyzdy keshendi alańǵa aınaldy.