Aqtóbe, Qaraǵandy jáne Pavlodarda ońaltýdyń jańa servıstik modeli iske qosyldy
ASTANA. KAZINFORM — Aqtóbe, Qaraǵandy jáne Pavlodar oblystarynda múgedektigi bar azamattardy ońaltýdyń tehnıkalyq quraldarymen qamtamasyz etýdiń jańa servıstik modeli boıynsha pılottyq joba iske qosyldy. Bul týraly QR Eńbek jáne halyqty áleýmettik qorǵaý mınıstrligi málim etti.
Jobany mınıstrlik pen Áleýmettik qorǵaý salasyn damytýdyń ulttyq ǵylymı ortalyǵy úsh óńirdiń ákimdikterimen birlesip júzege asyryp jatyr.
Pılottyq jobanyń iske asyrylýy Qazaqstan Respýblıkasynyń 2025-2030 jyldarǵa arnalǵan ınklıýzıvtik saıasat tujyrymdamasynda kózdelgen jáne ońaltýdyń tehnıkalyq quraldaryn olardyń tolyq qoldaný tsıkli boıyna súıemeldeýdiń jańa servıstik modelin engizýge baǵyttalǵan. Jobanyń basty maqsaty — ońaltýdyń tehnıkalyq quraldaryn úzdiksiz paıdalanýdy qamtamasyz etý, múgedektigi bar azamattarǵa kórsetiletin servıstik qyzmettiń sapasyn arttyrý jáne memlekettik resýrstardy tıimdi paıdalanýdy qamtamasyz etý.
— Pılottyq joba ońaltýdyń tehnıkalyq quraldarymen qamtamasyz etýdiń qoldanystaǵy tártibin ózgertpeıdi. Qazaqstan Respýblıkasynyń zańnamasynda kózdelgen múgedektigi bar azamattardyń barlyq quqyqtary tolyq saqtalady. Tehnıkalyq ońaltý quralynyń paıdalaný merzimi aıaqtalǵannan keıin azamattar burynǵydaı Áleýmettik qyzmetter portaly arqyly zańnamada belgilengen tártippen jańa quraldy óz betinshe tańdaı alady, — dep habarlady mınıstrlikten.
Jańa servıstik model boıynsha ońaltýdyń tehnıkalyq quraly buzylǵan jaǵdaıda azamat jóndeý kezeńinde qajetti quralsyz qalmaıdy. Ulttyq ǵylymı ortalyqtyń fılıalyna júgingennen keıin mamandar áleýmettik-tehnıkalyq saraptama júrgizip, jóndeý jumystaryn uıymdastyrady, qajet bolǵan jaǵdaıda aıyrbastaý qorynan dál sondaı jumys isteıtin quraldy ýaqytsha beredi. Eger buıymdy qalpyna keltirý múmkin bolmasa, azamat zańnamada belgilengen tártippen jańa qural alǵanǵa deıin ýaqytsha ońaltýdyń tehnıkalyq quralyn paıdalana beredi.
— Pılottyq jobada balalardy qamtamasyz etýge erekshe kóńil bólingen. Eger berilgen qural balanyń boıyna nemese jeke fızıologııalyq erekshelikterine sáıkes kelmeı qalsa, ony merziminen buryn aýystyrýǵa bolady. Bul ońaltý protsesiniń úzdiksizdigin qamtamasyz etýge múmkindik beredi, — delingen habarlamada.
Ońaltýdyń tehnıkalyq quraldarynyń ómirlik tsıkliniń barlyq kezeńderi — berý, qaıtarý, jóndeý, sanıtarlyq óńdeý jáne qaıta berý — tsıfrlyq formatta súıemeldenedi. Bul protsesterdiń ashyqtyǵyn, ýaqtyly servıstik qyzmet kórsetýdi jáne kórsetiletin qyzmetterdiń sapasyn baqylaýdy qamtamasyz etedi.
Pılottyq joba kezeń-kezeńimen iske asyrylady. Birinshi kezeńde jańa servıstik model arbalar men júrýge arnalǵan quraldardyń barlyq túrlerin qamtıdy. Keıinnen bul tetik pılottyq jobaǵa engizilgen ońaltýdyń tehnıkalyq quraldarynyń basqa túrlerine de taratylady.
Azamattardyń pılottyq jobaǵa qatysýy erikti túrde júzege asyrylady. Jobanyń qorytyndysy boıynsha jańa servıstik modeldiń tıimdiligine keshendi baǵalaý júrgizilip, múgedektigi bar azamattardy ońaltýdyń tehnıkalyq quraldarymen qamtamasyz etý júıesin odan ári jetildirý jóninde usynystar ázirlenedi.
Aıta keteıik, múgedektigi bar azamattardyń quqyǵyn qorǵaý baǵytynda 485 tekserý júrgizildi.
