«Aqtóbe-Qarabutaq-Ulǵaısyn» jolyn jóndeý úshin JSQ ázirlenip jatyr
Kúrdeli jóndeý jumysyn qajet etip turǵan «Aqtóbe-Qarabutaq-Ulǵaısyn» tasjolynyń uzyndyǵy – 262 shaqyrym. Qazir jobalyq-smetalyq qujaty ázirlenip jatyr. Ashat Shaharov Hromtaýǵa jumys saparynda sharýalarmen de kezdesti, dep habarlaıdy Kazinform.
Aqtóbe oblysynyń ákimi Ashat Shaharov Hromtaý aýdanyna jumys saparymen bardy. Aldymen jol qurylysy barysyn kórdi. Aqjar aýylyna kirer jolda «Qazavtojol» UK» AQ Aqtóbe fılıaly dırektorynyń orynbasary Asylbek Muhambetqalıev óńir basshysyna «Aqtóbe-Qarabutaq-Ulǵaısyn» avtojolyn qaıta jańǵyrtý jobasyn tanystyrdy.
Sonymen birge respýblıkalyq mańyzy bar avtomobıl joldaryn kútip ustaýǵa daıyndyq jóninde aıtty. «Aqtóbe-Qarabutaq-Ulǵaısyn» jolynyń qazirgi kúıi nashar, júrgizýshiler tarapynan aıtylatyn shaǵym kóp. Qazirgi ýaqytta joldy jóndeýge jobalyq-smetalyq qujattama ázirlenip jatyr.
Jalpy uzyndyǵy 262 shaqyrym jol jeti ýchaskege bólindi. Sonyń ishinde uzyndyǵy 56 shaqyrym bolatyn eki ýchaskede kelesi jyly jóndeý jumystary bastalady dep josparlanyp otyr.
Nátıjesinde qazirgi eki jolaqty jol tórt jolaqtyǵa deıin keńeıtiledi. Joba aıasynda kópirler, kólik aıyryqtary, mal aıdaıtyn joldar men sý ótkizgish qubyrlar salý da qarastyrylǵan.
«Jol salǵan kezde 268 sý ótkizý qubyry, 13 aspaly kópir, 23 kópir bolady dep josparlanyp otyr. Qoǵamdyq kezdesýler ótti. Aýyl turǵyndary ótinish-tilegin aıtty. Mal, aýyl sharýashylyǵy tehnıkasy ótetin oryndar da anyqtalyp, sheshildi. Eldi mekenderge kirip-shyǵý úshin bólek jol bolady. Jospar boıynsha «Aqtóbe-Qarabutaq-Ulǵaısyn» jolynyń eki ýchaskesinde keler jyly qurylys bastalsa, ózgesine saraptama jumysy júrgiziledi», - dedi «Qazavtojol» UK» AQ Aqtóbe fılıaly dırektorynyń orynbasary Asylbek Muhambetqalıev.
Aqtóbe oblysynyń ákimi Ashat Shaharovtyń aýdanǵa issaparynda Hromtaý aýdanynyń ákimi Nurhan Tileýmuratov oblystyq mańyzy bar joldardy jóndeý jumystarynyń barysy týraly málimet berdi. Qazir «Abaı-B» JShS merdigerlik uıymynyń nysandary – «Qudyqsaı-Qopa» tas joly, Qyzylsý aýylyna kireberis jáne Qarǵaly aýdany baǵytyndaǵy jol. Qurylys-montaj jumystary bitpegen. Atalǵan seriktestiktiń basqa aýdandarda da jumysy aıaqtalmaı jatqan problemalyq nysandary bar.
Kompanııa ókilderi materıaldardyń, sonyń ishinde asfalt qurylysy materıaldarynyń qymbat ekenin alǵa tartyp, qarjylandyrýdy arttyrý maqsatynda jobalarǵa túzetý engizýdi surap otyr. Oblys ákimi kásiporyn ókilderine 2022 jyldan bastap jobalyq-smetalyq qujattamada kórsetilgen qarjyǵa materıaldardy satyp alyp, atalǵan jobalardy jumysty aıaqtaýǵa ýaqyty jetkilikti bolǵanyn atap ótti.
Ashat Shaharov kelisimshart mindettemelerin tıisti deńgeıde oryndamaǵan merdiger uıymdy jaýapqa tartý kerek ekenin basa aıtty. Sonymen qatar oblys ákimi problemalyq jol qurylysy jobalarynyń aıaqtalýyn qamtamasyz etý, sondaı-aq qysqy kezeńde joldardy sapaly kútip ustaý boıynsha birqatar tapsyrma berdi.
Hromtaý aýdanyna jumys sapary barysynda oblys ákimi Ashat Shaharov «AqMez» jaýapkershiligi shekteýli seriktestiginiń maı ekstraktsııalyq zaýytynyń jumysymen tanysty. Bul kásiporyn basshylaryna óndiris kólemin ulǵaıtyp, maıdy tazartý tsehyn salý mindeti qoıylyp otyr. Sóıtip óńirdegi azyq-túlik qaýipsizdigin nyǵaıtýǵa jáne tazartylǵan kúnbaǵys maıynyń baǵasyn turaqtandyrýǵa oń yqpalyn tıgizedi.
Qazir zaýytta shıki kúnbaǵys maıy óndirilip, kúnbaǵystyń qabyǵynan mal azyǵy daıyndalady. Mundaǵy óndiristiń qýattylyǵyn keńeıtý úshin birqatar kedergi kezikti. Byltyr salynǵan sý qubyry iske qosylmaı tur. Qarjy «Bıznestiń jol kartasy – 2020-2025» baǵdarlamasy aıasynda bólingenimen, sý shyǵar emes. Mamandar ázirge onyń sebebin anyqtaı almaı otyr. Al sý qubyrynsyz maı tazartý tsehyn keńeıtip, iske qosý múmkin emes. Oblys ákimi Ashat Shaharov bul máseleni sheshý úshin jergilikti bılik keshendi sharalar qabyldaýy keregin qadap aıtty.
«Kemshilikterdi anyqtap, olardy joıý qajet. Óndiris kólemi arttyrýdy maqsat etip otyrǵan kásiporyndy qoldaýymyz kerek. Sebebi tsehtyń iske qosylýy ıaǵnı maı óńdeý isin damytý ishki naryqqa da tıimdi», - dedi Ashat Shaharov.
Sonymen qatar kúnbaǵys ósirýge sýbsıdııa tóleý, mıneraldy tyńaıtqyshtar alý, qysqy otynmen qamtamasyz etý jaıy sóz boldy. Aımaq basshysy bul máseleler óz baqylaýynda bolatynyn aıtty.
