Aqtóbe - Qandyaǵash tas jolyn jóndeýge 65 mlrd teńge qaryz alynady
AQTÓBE. QazAqparat - «Aqtóbe - Atyraý» tas jolynyń Aqtóbe - Qandyaǵash bóligine 65 mıllıard teńge qaryz alynady, dep habarlaıdy QazAqparat tilshisi.
Aqtóbelikter asyǵa kútken Aqtóbe - Qandyaǵash tas jolyn jóndeý úshin Azııa damý bankinen 65 mıllıard teńge qaryz alynady. Bul aqsha 25 jylǵa berilmek. Búgin Óńirlik kommýnıkatsııalar qyzmetinde «QazaqAvtoJol» UK» AQ oblystyq fılıal dırektory Marat Mahambetov jobanyń tehnıkalyq-ekonomıkalyq negizdemesi daıyndalyp, memlekettik saraptamaǵa jiberilgenin habarlady.
«Óńirde respýblıkalyq mańyzy bar jol 1892 shaqyrymdy quraıdy. Qaıta jóndeý jumystary «Aqtóbe - Atyraý - Astrahan» tas jolynyń 330 shaqyrymy Aqtóbe óńirine tıesili. Joldyń 100-160, 160-200, 236-275, 275-330 shaqyrymdary jóndelip jatyr. Al «Aqtóbe - Qandyaǵashtyń» 89 shaqyrymdyq joly 2020-2023 jyldary salynady. Azııa damý bankimen kelisimshart qazan aıynda jasalyp, jyl sońynda qurylysty bastaıtyn merdigerler anyqtalady», - dedi Marat Mahambetov.
Buǵan deıin habarlaǵanymyzdaı, bul jol 9 metrge deıin keńeıtiledi. Qurylysty júrgizetin merdigerler 2 jylǵa kepildik beredi.
Al jergilikti joldardy jóndeýge bıyl 17 mıllıard teńge jumsalady. Barlyǵy 250 shaqyrym tasjol qalpyna keltirilmek.
«Aqtóbe-Bolgarka-Shubarqudyq, Aqtóbe-Rodnıkovka, Hromtaý-Badamsha, Oıyl-Shubarqudyq arasyndaǵy jolda kólik az. Sondyqtan bul joldar ortasha jóndeýden ótedi. Shamamen shaqyrymyna 30-35 mıllıon teńge jumsalady. Joldy salǵanda 15-20 sm tsement qosylǵan qıyrshyq tas, keıin 5 sm asfalt tóseledi», - dedi oblystyq jolaýshylar kóligi jáne avtomobıl joldary basqarmasy basshysynyń mindetin atqarýshy Nurken Áspenov.
Eske salsaq, Memleket basshysy Qasym - Jomart Toqaev óńirge sapary kezinde «Aqtóbe - Qandyaǵash» jolynda qozǵalys kóp, sondyqtan osy baǵytty salýdy jedeldetý kerek dep tapsyrma bergen bolatyn.
