Almaty-Qaskeleń jolyn keńeıtý: nelikten ýchaskede jumys qarqyny tómendedi

QONAEV. KAZINFORM — Áleýmettik jelide adamdar Almaty — Bishkek jolynyń 19–27 km ýchaskesinde joldy keńeıtý jumystarynyń qarqyny tómendegenin aıtyp, shaǵym bildirdi.

Almaty-Qaskeleń jolyn keńeıtý: nelikten ýchaskede jumys qarqyny tómendedi
Foto: Vıdeodan skrın

— Bul joldy 8 jolaqty qylyp jasaımyz degende keremet bastap edi. 2027 jylǵa deıin biraz jumysty bitirip tastaıdy dep el qýandy. Biraq qazir ondaı qarqyn joq. Aǵashtardy kesip, tehnıka kelip, keremet jumys bolyp edi. Sol qarqyn basylyp qaldy. «QazAvtoJol» jumystardy qaı ýaqytta bitireıin dep otsyzdar, — deıdi beınejazba Erkebulan esimdi turǵyn.

Atalǵan beınejazbaǵa «QazAvtoJol» UK» AQ baspasóz qyzmeti pikir bildirip, túsinikteme berdi. Kompanııa jaýabyna sáıkes, Almaty — Bishkek avtomobıl jolynyń 19–27 shaqyrym ýchaskesinde qoldanystaǵy jol tósemin buzý jáne jańa jol jabynyn tóseý boıynsha negizgi jumystardy 2027 jyldyń kókteminde bastaý josparlanǵan.

Mundaı sheshim qysqy kezeńniń jaqyndaýyna jáne jobany iske asyrýdyń tehnologııalyq erekshelikterine baılanysty qabyldanǵan. Joba aıasynda avtomobıl jolyn segiz qozǵalys jolaǵyna deıin keńeıtý kózdelgen. Bul jumystar aıasynda jol tóseminiń konstrýktsııasyn tolyǵymen aýystyrý, bıiktik belgilerin ózgertý, sondaı-aq qoldanystaǵy bólý jolaǵyn jáne onda ornalasqan jaryqtandyrý tirekterin demontajdaý talap etiledi.

«QazAvtoJol» UK» AQ málimetinshe, bul jumystar tehnologııalyq rettilikti saqtaı otyryp, kezeń-kezeńimen oryndalady. Birinshi kezekte ınjenerlik kommýnıkatsııalardy qaıta ornatý jumystary aıaqtalady, sodan keıin qoldanystaǵy jol tósemin demontajdaý jáne jańa jol tóseminiń konstrýktsııasyn salý jumystary júrgiziledi.

— Qysqy kezeń qarsańynda aýqymdy demontajdaý jumystaryn bastaý onsyz da kúrdeli jol qozǵalysy jaǵdaıyn odan ári qıyndatyp (qozǵalys qarqyndylyǵy táýligine 100 myń avtokólik), júrgizýshiler men jergilikti turǵyndarǵa aıtarlyqtaı qolaısyzdyqtar týǵyzady. Qazirgi ýaqytta negizgi nazar jol ótkelderi men kólik aıryqtaryn salýǵa, ınjenerlik kommýnıkatsııalardy qaıta ornatýǵa jáne qajetti jol-qurylys materıaldaryn daıyndaýǵa aýdaryldy, — delingen kompanııa jaýabynda.

Eske salaıyq, bıyl Prezıdent tapsyrmasy negizinde Almatydan Qaskeleń qalasyna deıingi avtojol ýchaskesiniń 8 shaqyrymdyq bóligin 8 jolaqqa deıin keńeıtý jobasy bastaldy. Munda eki jolaıryq pen 9 jerústi jaıaý júrginshiler ótkelin salý josparlanyp otyr. Nátıjesinde atalǵan ýchaskeniń ótkizý qabileti 2 ese artady.

Jobany qarjylandyrý Qazaqstannyń Damý banki arqyly júzege asyrylyp jatyr. Bul jumysqa jalpy 33,9 mlrd teńge jumsalady.