«Aqtóbe-Qandyaǵash» avtojolynyń qaıta jańarý jumystary 2024 jyldyń sońyna deıin aıaqtalady
ASTANA. KAZINFORM – «QazAvtojol» ulttyq kompanııasy respýblıkalyq mańyzy bar «Aqtóbe-Qandyaǵash» avtojolynyń 11-100 shaqyrymdaǵy ýchaskesinde qaıta jańarý jumystaryn júrgizip jatyr. «QazAvtoJol» UQ» AQ baspasóz qyzmeti málim etti.
Jyl basynan beri qurylys nysanynda 125 myń tonnadan asa asfaltobeton qospasy qoldanylyp, ol 30 myń shaqyrymǵa jýyq joldy salýǵa múmkindik berdi.
«Qaıta jańarý jumystarynyń jospary boıynsha 96 shaqyrym avtojol jańartylyp, onyń ishinde 78 shaqyrymy Aqtóbe qalasynan Qandyaǵash qalasyna deıin tórt jolaqty І-B tehnıkalyq sanatyna aýystyrylady. Al taǵy 18 shaqyrymy Qandyaǵash qalasyn aınalyp ótetin ІІ tehnıkalyq sanattaǵy eki jolaqty bolyp jabdyqtalmaq», - dep habarlady «QazAvtoJol» UQ» AQ baspasóz qyzmeti.
Sonymen qatar, joba aıasynda 18 kópir qurylysyn salý, 66 qubyr tartý jáne osy jol ýchaskesinde qyzmet kórsetý úshin qajetti ınfraqurylymdy soǵý josparlanǵan.
Atalmysh jol ýchaskesindegi qaıta jańarý jumystary Aqtóbe jáne Atyraý oblystary arasyndaǵy kólik logıstıkasyn jaqsartýǵa, joldyń tehnıkalyq parametrlerin ońtaılandyrýǵa, jol júrý ýaqytyn qysqartýǵa jáne onyń ótkizý qabiletin arttyrýǵa ákeledi.
Jobany 2024 jyldyń sońyna deıin aıaqtaý josparlanyp otyr.
Sondaı-aq «Aqtóbe-Hromtaý-Qarabutaq» avtojolynyń 773-912 shaqyrymyndaǵy ýchaskesinde jol qabatyn tegisteý boıynsha aǵymdaǵy jóndeý jumystary júrgizilip jatyr.
2025 jyly osy ýchaskede І tehnıkalyq sanatqa kóshirý boıynsha qaıta jańarý jumystaryn bastaý josparlanyp otyr.
