«Aqtóbe – Qandyaǵash» avtojoly aqyly bolady
ASTANA. KAZINFORM — Jol júrý aqysy ýchaskelerge qaraı ártúrli bolady.
Kólik mınıstrligi aqyly avtomobıl joldarynyń jelisin keńeıtip jatyr. Osyǵan baılanysty «Qandyaǵash — Maqat» aqyly jolynyń quramyna «Aqtóbe — Qandyaǵash» avtojolynyń 11-shaqyrymynan 100-shaqyrymyna deıingi qaıta jańǵyrtylǵan bóligi engiziledi.
— Jol júrý aqysy ýchaskelerge qaraı ártúrli bolady. Atap aıtqanda, 11-shaqyrymnan 87-shaqyrymǵa deıingi aralyqta barlyq kólik túri, sonyń ishinde jeńil avtomobılder úshin de aqy alynady. Al 87-shaqyrymnan 100-shaqyrymǵa deıingi ýchaskede jáne «Qandyaǵash — Maqat» jolynyń qalǵan bóliginde aqy tek avtobýstar men júk avtomobılderinen alynady.
Jol júrý quny júrip ótken qashyqtyqqa, kólik quralynyń sanatyna, júk kótergishtigine jáne tólem tásiline baılanysty belgilenedi. Іrgeles aýdandardyń turǵyndaryna jeńildikpen abonementter qarastyrylǵan. Jergilikti turǵyndardyń jeńil avtomobılderine arnalǵan jyldyq abonement quny 1 AEK bolady. Al jergilikti avtobýstar men júk avtomobılderi úshin kólik sanatyna qaraı aılyq abonement quny 1-den 5 AEK-ke deıin, jyldyq abonement 12-den 60 AEK-ke deıin belgilenedi, — delingen mınıstrlik habarlamasynda.
Jınalǵan qarajattyń barlyǵy jol ınfraqurylymyn kútip ustaýǵa jáne jóndeýge, sondaı-aq arnaıy tehnıka satyp alýǵa jumsalady.
Osyǵan baılanysty Qazaqstan Respýblıkasy Kólik mınıstriniń buıryǵyna tıisti ózgerister engizildi. Olar alǵash ret resmı jarııalanǵan kúnnen keıin 10 kúntizbelik kún ótken soń kúshine enedi.
Aıta ketelik Almatyda aqyly joldy jeńildikpen tóleýdi usynatyn jalǵan SMS-habarlamalar jiberilgeni týraly jazǵan edik.
