Aqtóbe qalasynyń turǵyny Qarjy mınıstrligine nelikten shaǵym túsirgeni túsindirildi
Baspasóz qyzmeti taratqan málimetterge qaraǵanda, sot sheshimimen aqtalǵan azamatsha Dıýsekenova J.B. moraldyq zııandy óteýdi talap etip otyr.
Aqtóbe qalalyq soty J.B.Dıýsekenovanyń 3 000 000 teńge mólsherindegi moraldyq zııandy óteý týraly talap-aryzyn qarap jatyr. Aıta keteıik, atalǵan is boıynsha Aqtóbe oblysynyń polıtsııa departamenti men Qarjy mınıstrligi tartyldy.
Qarjy mınıstrligi atalǵan sanattaǵy ister boıynsha sottarǵa memlekettik qazynanyń ókili retinde qatysady jáne qylmystyq qýdalaýǵa eshqandaı qatysy joq.
Sonymen birge mınıstrlikte sot aqtaǵan adamnyń qylmystyq protsesti júrgizetin organnyń zańsyz áreketteri nátıjesinde keltirilgen zııan úshin ótemaqy alýǵa quqyly ekenin aıtty (QR QPK 38 b. 2 ból. 1 t.)
Azamatqa zańsyz qýdalaý, qamaýda ustaýdy zańsyz qoldaný, úı qamaǵynda ustaý, aldyn-alý sharasy retinde ketpeý týraly sheshim qabyldaý nátıjesinde azamatqa keltirilgen zııandy memleket óteıdi (QR AІJK-niń 923-babynyń 1-tarmaǵy).
Tólem Qarjy mınıstrligi basqaratyn 010 «Qazaqstan Respýblıkasy Úkimetiniń rezervi» bıýdjettik baǵdarlamasyna sáıkes júzege asyrylady.
Vedomstvoda bul azamattyq isti qaraý áli aıaqtalmaǵanyn atap ótti.
Eske salaıyq, 2019 jylǵy 14 naýryzda J.B.Dıýsekenova Aqtóbe oblysy ІІD-niń ishki ister basqarmasy aǵa tergeýshisiniń qaýlysymen qylmystyq is boıynsha kúdikti dep tanylyp, onyń áreketteri Qylmystyq kodekstiń 190-baby, 3-bóligi, 2-tarmaǵy boıynsha kvalıfıkatsııalanǵan.
Keıin tergelip jatqan qylmystyq is Aqtóbe oblysy boıynsha sybaılas jemqorlyqqa qarsy qyzmetke ótkizilip, tergeý nátıjeleri boıynsha qylmystyq is sotqa jiberildi.
Aqtóbe qalasynyń №2 sotynyń 2020 jylǵy 19 aqpandaǵy úkimimen Dıýsekenova J.B. is-áreketterinde qylmystyq quqyq buzýshylyq bolmaǵany úshin aqtaldy.
Aqtóbe qalasy №2 sotynyń 2020 jylǵy 24 shildedegi qaýlysymen J.B.Dıýsekenovanyń múliktik zııandy óteý bóliginde talaptary qanaǵattandyryldy jáne onyń paıdasyna memleket qazynasynan 4 072 073 teńge óndirildi.
