Aqtóbe qalasynyń mańaıyn qoqystan tazartý úshin 200 mln teńge qajet
AQTÓBE. QazAqparat – Aqtóbe qalasynda qoqys ýaqytyly shyǵarylmaı jatyr. Turmystyq qaldyqtardy shyǵaratyn kompanııalar tólemniń ýaqytynda jasalmaıtynyn, turǵyndardyń 35 paıyzy abonement tiziminde múlde joq ekenin aıtyp berdi, dep habarlaıdy QazAqparat tilshisi.
Aqtóbedegi qoqys shyǵarý isi turalap tur. Turǵyndar kún saıyn áleýmettik jeli arqyly narazylyqtaryn bildirip, 1-2 apta boıy tazartý jumystary júrgizilmegenin, sasyq ıis qolqany qabatynyn aıtyp jatyr. Qala ákimdigi buǵan deıin jedel shtab qurǵan bolatyn. Alaıda jumys kún ótken saıyn qıyndap barady. Jergilikti ákimdik «Tabys Aqtóbe» JShS men óńirdegi qurylys, jol qurylysy kompanııalarynan kómek surady.
«Taza laıf» jeke kásipkeri 12 qyrkúıekten bastap jumysyn toqtatatynyn jetkizdi. Biraq shyn máninde olar tamyz aıynan beri jumys istemeı, olardyń terrıtorııasyna baılanysty shaǵym kóbeıdi. Qazir «Neo Plus» pen «№27 basqarý kompanııasy» JShS qoqysty ýaqytyly shyǵaryp jatyr. Tutynýshylar alǵashqysyna 43 mıllıon, keıingisine 55 mıllıon teńge qaryz. Halyq sol aqshany ýaqytyly tólese mundaı problema týyndamas edi. Negizi jaz aılarynda qoqys kóbeıip tur. Qurylys jumystaryn júrgizgen adamdar bárin jáshikke aparady, keıbiri qalanyń shetindegi orman ishine, saı-salaǵa tastap ketedi. Qazir qala aýmaǵynda 375 beı-bereket jatqan qoqys orny paıda bolǵan. Ǵaryshtan túsirgende kórindi. Ony tazartýǵa 200 mıllıon teńge qajet», - dedi qalalyq turǵyn úı-kommýnaldyq sharýashylyq bóliminiń sektor meńgerýshisi Hasen ıÝsýpov.
Aıta keteıik, qazir qala syrtyndaǵy emes, ishindegi qoqysty shyǵaratyn arnaıy mekeme tabylmaı jatyr. Sebebi kóbinde tehnıka joq.
«Qoqys jáshiginiń janynda jatqan qurylys materıaldaryn, jıhaz, turmystyq tehnıkany shyǵarýǵa bıýdjetten qosymsha aqsha bólinbeıdi. Sebebi adamdar úısiz-kúısiz júr, al biz qoqys úshin bıýdjetten taǵy shyǵyn shyǵara almaımyz. Bári halyqtyń sana-sezimine baılanysty. Qazaqstanda eń tómengi tarıf Aqtóbede eken. Sony ýaqytyly tólese bolǵany. Al biz ózimizdi ózimiz qoqysqa batyryp otyrmyz», - dedi Hasen ıÝsýpov.
