Aqtóbe qalasynyń ákimi Murat Jórebekov qyzmetinen ketti
Aqtóbe qalasynyń ákimi qyzmetin 4 qańtar kúni bastaǵan M. Jórebekov sońǵy kúnderi kórinbeı ketken edi. Tek 28 maýsymda qala kúninde aqtóbelikterdi quttyqtap, birneshe mádenı sharaǵa qatysty. Al búgin ol qyzmetinen ketkenin aıtty.
«Búgin men sizdermen Aqtóbe qalasynyń ákimi laýazymyndaǵy qyzmetimdi aıaqtaǵanym jaıynda jáne ortalyqqa basqa jumysqa aýysatynym týraly jańalyǵymmen bólisip otyrmyn.
Týǵan kalam – Aqtóbeme qyzmet qylý – men úshin bıik mártebe, zor jaýapkershilik, úlken tájirıbe mektebi boldy. Óńir basshysy Eraly Luqpanulyna, barlyq áriptesterge rızashylyǵymdy bildiremin. Qoldaý kórsetken barsha Aqtóbe halqyna alǵysym sheksiz.
Ýaqyt bir ornynda turmaıdy. Áli-aq sizdermen birlesip bastaǵan jumystar qalamyzdyń damýyna oń áserin beredi dep senemin. Araıly Aqtóbemdi elimizdiń sáýletti shaharlarynyń qatarynan kóretinime kúmán joq.
Qadirli jerlester! Men úshin sizderdiń alǵystaryńyzdan artyq bata joq. Endigi jerde jańa qyzmette elimniń damýyna eńbek etýdi jalǵastyra beremin...», –delingen Aqtóbe ákiminiń baspasóz qyzmetkeri Aıgúl Báımenova jarııalaǵan M.Jórebekovtiń sózinde.
Eske salsaq, Murat Júrebekov 44 jasta. Q. Jubanov atyndaǵy Aqtóbe memlekettik ýnıversıtetin, Qazaqstan menedjment, ekonomıka jáne boljamdaý ınstıtýtyn, «Strathclyde» ýnıversıtetin (Shotlandııa, Glazgo q.), «Basqarýshy qyzmetkerlerge arnalǵan baǵdarlama» mamandyǵy boıynsha Garvard bıznes mektebin (AQSh, Boston q.), 2019 jyly Qazaq-Brıtan tehnıkalyq ýnıversıtetin bitirgen.
Eńbek jolyn 2001 jyly «QazTransGaz» JAQ Qarashyǵanaq jobasy boıynsha departamenttiń bıýdjettik baqylaý jónindegi bas mamany retinde bastaǵan. Túrli jyldary «Intergaz Ortalyq Azııa» JAQ, London qalasyndaǵy «Adjıp KKO», «QazMunaıGaz» UK AQ, «PSA» JShS qyzmet etken. Aqtóbe qalasy ákimi laýazymyna deıin 2019 jyldyń jeltoqsan aıynan bastap QR Energetıka vıtse-mınıstri qyzmetin atqardy.
