Aqtóbe qalasyndaǵy «oq ótpeıtin» aıaldamalar taǵy ózgeretin boldy
Aqtóbe qalasynda 730-ǵa jýyq aıaldama orny bolsa, onyń teń jartysy bos tur. ıAǵnı, qoǵamdyq kólikti turǵyndar qysy-jazy jol jıeginde ǵana turyp kútýge májbúr. Al qazir № 6, 7, 8A, 17, 18, 21, 25, 27, 37, 42, 47 sekildi marshrýttardyń ara qashyqtyǵy jarty saǵatqa jýyq. Jańbyrly nemese ystyq kúni jolaýshylar qınalǵanymen, qazir bárine birdeı aıaldama pavılonyn ornatýǵa bıýdjet qarjysy jetpeıdi. Sondyqtan jergilikti bılik aıaldama salýǵa arnalǵan jerdi jalǵa bermek.
«Ákim aýysqanda aıaldamalardyń da ózgerip jatatynyn bilesizder. Bul bıýdjetke óz áserin tıgizedi. Endi biz bıýdjetten qarjy jumsamaı ınvestıtsııa tartqymyz keledi. Keıbir aıaldama oryndary ınvestıtsııalyq suranysqa ıe bolady dep oılaımyz. Aldymen qalanyń ortalyǵyna birkelki aıaldama pavılonyn salǵymyz keledi. Sol úshin turǵyndarǵa maketin usynyp, tańdaý jasaýyn, óz nusqasyn usynýyn suraımyz. Turǵyndar sýyq kezde jyly, qaýipsiz bolatyn pavılondardyń ornatylǵanyn qalap otyr. Ol jerde beınebaqylaý bolady degen jospar bar. Jazda salqyndatqysh jumys istep, wi-fi ornatylsa, múgedekterge yǵaıly bolsa degen talap qoıyldy. Qarasha aıynyń basyna deıin turǵyndardyń belsendilik tanytýyn suraımyz», - dedi qala ákiminiń orynbasary Sergeı Lı.
Jergilikti ákimdik bir kóshege birkelki aıaldama pavılonyn ornatýdy maqsat etip otyr. Sol arqyly kósheniń óz ereksheligin aıshyqtap kórsetpek. Ári bir kásipker qalanyń ortalyǵynda aıaldama pavılonyn ornatýǵa ruqsat alsa, oǵan qala mańyndaǵy aýyldarǵa taǵy beseýin salý mindettelmek.
«Aýyldyq jerlerge kásipkerler qymbat aıaldama pavılonyn qondyrmaýy múmkin. Sol sebepti bári eskeriledi, tıimdisi tańdalady. Bir eskertetin jaıt, biz halyqqa ornatamyz, biraq qazirdiń ózinde aıaldamanyń áınegin syndyryp, búldirip jatyr. Biz kim úshin jasaımyz? Bir adam syndyrady, myń adam negatıv jazady. «Ákimdik qaıda qarap otyr?» dep suraıdy turǵyndar», - dedi qala ákimi Mavr Abdýllın.
Aıta keteıik, Aqtóbe qalasyndaǵy aıaldama pavılondary 2017 jyly jańardy. Ár aıaldama quny shamamen 1 mıllıon teńgeden asady. Sol kezde qalany basqarǵan Іlııas Ispanov aıaldama áıneginiń oq ótpeıtinin qaıtalap aıtqan bolatyn. Búgingi qala ákimi sońǵy ret aıaldama qurylysyna bdıýjetten qansha teńge jumsalǵanyn aıtyp berýden bas tartty.
«Bizge deıin aıaldamalardy salýǵa bıýdjetten qansha qarjy bólingenin naqty aıta almaımyn. Sebebi biz ol ýaqytta qyzmet etken joqpyz, qansha qarjy ketti dep kóterip, tekserip, analız aıta almaımyn. Meniń bilip otyryp aıtpaı otyrǵan eshteńem joq. Ol aqparatty tekserip, qaratqan emespin», - dedi Mavr Abdýllın.
