Aqtóbe qalasynda tótenshe jaǵdaı jarııalandy
AQTÓBE. QazAqparat - Aqtóbe qalasy mańyndaǵy barlyq sý qoımasy lyq toldy. Qazirgi ýaqytta eń iri Qarǵaly sý qoımasyndaǵy sýdy jiberý josparlanyp otyr, dep habarlaıdy QazAqparat tilshisi.
Aqtóbe qalasyndaǵy jaǵdaı áli turaqtalar emes. Sý tasqynyna qarsy shtab búgin qalalyq ákimdikke shuǵyl jınalyp, jıyn ótkizdi. Qazirgi ýaqytta Sazdy, Aqtóbe, Qarǵaly sý qoımalary tolyp, eń iri Qarǵaly sý qoımasyn ashý josparlandy. Al Elek, Qarǵaly, Sazdy, Jińishke ózenderi táýligine 40-90 cantımetrge deıin kóterilip tur. Osyǵan oraı ákimdik tótenshe jaǵdaı jarııalap, komıssııa qurýǵa sheshim qabyldady.
«Qazirgi kezde 290 saıajaı men aýla sýǵa ketti. Baý-baqsha ujymyndaǵy 5 úı qulap qaldy. Barlyǵy 700-den astam adam evakýatsııalanyp, qutqaryldy. Olardyń arasynda balalar men múgedek adamdar da bar. Evakýatsııalanǵan adamdardy ýaqytsha qonystandyrý úshin 12 beket jumys ister tur. Orta mektepterde 200-ge jýyq adam qonystandy. Ózgesi týma-týystarynyń úıine ketti», - dep habarlady oblystyq tótenshe jaǵdaılar qyzmetiniń baspasóz qyzmeti.
Málimetke súıensek, sý túnde kóterilip, kúndiz keri qaıtyp tur. Aqtóbedegi jergilikti bılik tótenshe jaǵdaı jarııalanǵandyǵy týraly aqparatty áleýmettik jeliler arqyly taratyp, kúzet jumystaryn kúsheıtti. Sýdan qutqarý jumystaryna tótenshe jaǵdaılar qyzmetiniń 85 adamy men 20 tehnıka jumyldyrylǵan. Al ishki ister departamenti 120-dan astam adam men 63 tehnıkany berdi. Sonymen qatar, úrmeli qaıyqtar men jeke menshik kompanııalardyń aýyr tehnıkalary qurqarý jumystaryn júrgizip jatyr.
«Oblysta 13 sý tasqynyna qarsy shtab quryldy. Qutqarýshylar bir táýlikte 2 myńnan astam qummen toltyrylǵan qapty tósedi. Oblystyq tótenshe jaǵdaılar qyzmeti keshe Qarǵaly men Aqtóbe sý qoımasyn tikushaq arqyly baqylady. Ólsheý quraldary qondyrylyp, jergilikti polıtsııa qyzmeti kezekshilikke kóshti. Sýǵa ketý qaýpi basym aýmaqta Mahambetovka aýyly, Kirpishti aýylynyń kópir mańy, Zarechnyı-2 aýyly men birneshe baý-baqsha ujymy bar», - dep habar taratty oblystyq tótenshe jaǵdaılar departamenti.
Aıta keteıik, Aqtóbe qalasynda mundaı jaǵdaı sońǵy ret 1996 jyly tirkelgen eken. Sýdan qutqarý jumystaryna qala boıynsha 450 mıllıon teńge bólindi.
