Aqtóbe qalasynda tarıf kóterilgenimen, qoqys shyǵarý jumysy rettelmeı tur

AQTÓBE. QazAqparat – Aqtóbe qalasyndaǵy birneshe shaǵyn aýdanda qoqys shyǵarý jumysy kesheýildep tur. Shilde aıynda tarıf kóterilgenimen, qoqys eki-úsh apta boıy jınalmaı, úıilip jatyr, dep habarlaıdy QazAqparat tilshisi.

Aqtóbe qalasynyń aýmaǵy jyl saıyn úlkeıip keledi. Sáıkesinshe kommýnaldyq mekemelerdiń jumysy artty.

«Qalada qoqys shyǵarý jumysy qıyndap ketti. Qaıda barsań da, qaıda qarasań da úıilgen qoqys. Bizdiń aýladaǵy qoqys bir apta alynbaı, shirip, ıis shyǵyp ketti. Aldymen konteınerler toldy, keıin adamdar amaly joq bolǵan soń jan-jaǵyna laqtyrdy. Al ol jerde mashına da, adam da júredi», - dedi qala turǵyny Zakııa Asanova.

Qazirgi kezde qalalyq máslıhattyń sheshimimen Aqtóbe qalasynda qoqys shyǵarý tarıfi kóterildi. Alǵashynda shilde aıyndaǵy jumystyń mardymsyz júrgeni eskerilip, tek tamyz aıynan bastap jańa tarıfke kóshý mindetteldi. Alaıda turǵyndar shilde aıynan bastap jańa tarıfpen eseptelgenin, al jumystyń durys júrgizilmegenin aıtyp shaǵymdandy.

«Qala aýmaǵyndańy tarıfterdi qaıta esepteý jumysy júrgizildi. Kópqabatty páter turǵyndarynyń árqaısysyna 417 teńge, al jer úılerdegi turǵyndarǵa 450 teńge bolyp bekitildi. Biz 1-tamyzdan bastap jańa tarıfpen esepteýdi jón kórdik. Alaıda merdiger kompanııalar jańa tarıfpen eseptep, túbirtek jibergen. Sondyqtan tamyzda qaıta shegerý jumysy júrgiziledi. Qaladaǵy qoqys shyǵarý mekemeleri qatelesip ketken»,- dedi Aqtóbe qalalyq TÚKSh, jolaýshylar kóligi jáne avtomobıl joldary bóliminiń basshysy Jomart Baqytkeldi.

Osy aıda Aqtóbe qalasynda qoqys shyǵarý úshin jańa kompanııa quryldy. Bul kompanııa «Aqtóbe» ÁKK» AQ-y janynan ashyldy. Jańa kompanııaǵa tehnıka satyp alý úshin bıýdjetten 3 mlrd teńge qarjy bólindi. Alaıda qaladaǵy qoqys shyǵarý máselesi áli sheshimin tappady.

«Clean city» mekemesi qoqysty ýaqytyly shyǵarmady. Qıyndyqtar týyndaǵany ras. Jańa qurylǵan kompanııaǵa qajetti barlyq tehnıka 10-qyrkúıekke deıin jetkiziledi. Bári qalypqa keltiriledi. Qazir kesteden qalý bar. 1-2 kún keshigip jatyr. Kólikter qosymsha tartylady. «ATK qyzmet» mekemesinde 12 arnaıy kólik, 10 júk kóligi, 3 júk tıegish bar. Al ózge eki merdiger mekemede jumys ýaqytyly júrgizilip jatyr»,- dedi Aqtóbe qalalyq TÚKSh, jolaýshylar kóligi jáne avtomobıl joldary bóliminiń basshysy Jomart Baqytkeldi.