Aqtóbe qalasynda sý tasqynyna qarsy shtab jumysyn bastady
AQTÓBE. QazAqparat - Aqtóbe qalasynda sý tasqynynyń aldyn alý úshin jedel shtab quryldy. Barlyǵy 100-den astam tehnıka sý sorý jumystaryn júrgizýge daıyn, dep habarlaıdy QazAqparat tilshisi.
Aqtóbe qalasynda sý tasqynynyń aldyn alý jumystary kúsheıtildi. Qalalyq sý tasqynyna qarsy shtab búgin óz jumysyn bastap, mamandar turǵyndardan shaqyrý ala bastady. Aqtóbe qalasy ákimi apparatynyń áskerı-jumyldyrý jumysy, azamattyq qorǵanys jáne tótenshe jaǵdaılar bóliminiń basshysy Bekbolat Nurashevtiń aıtýynsha, bıyl 100-den astam sý sorý tehnıkasy daıyndaldy. Sonymen qatar, 10 júk kóligi, 3 jyljymaly nasos bar. Tipti, býldozer, kran, ekskavatorlar, tıegishter, tral da daıyn tur.
Aqtóbe qalasy ákiminiń baspasóz qyzmetiniń habarlaýynsha, qańtar aıynan bastap 190 myń tekshe metrden astam qar shyǵaryldy. Kómek suraǵan turǵyndarǵa sý sorý kóligi men ınertti materıaldar tek komıssııa qorytyndysynan soń beriledi.
Eske salsaq, Aqtóbe oblysy boıynsha barlyǵy 43 eldimekendi sý basý qaýpi basym. Bul aýmaqta 12 myńnan astam adam turady. Tótenshe jaǵdaılar qyzmeti aldaǵy eki kúnde jańbyr jaýyp, sý deńgeıi kóterilýi múmkin degen eskertý jasady.
