Aqtóbe qalasynda qoqys shyǵarý kompanııalary jumysyn toqtatty
AQTÓBE. QazAqparat – Aqtóbe qalasynda qoqys shyǵaratyn úsh kompanııanyń ekeýi jumysyn toqtatty. Qazir osyǵan baılanysty ákimdikte jedel shtab quryldy, dep habarlaıdy QazAqparat tilshisi.
Qalanyń bir bóligindegi qatty qaldyqtardy shyǵarǵan №27 basqarýshy kompanııasy jáne «Taza Laıf» jeke kásipkeri óz jumysyn toqtatty.
«Qarjylyq qıyndyqtarǵa baılanysty eki kompanııa óz jumystaryn toqtatyp jatyr. Olar – №27 basqarýshy kompanııasy men «Taza Laıf» jeke kásipkeri. Sebebi qazirgi tarıf arnaıy tehnıka men qyzmetkerlerdi ustaýǵa arnalǵan qarjyny óteı almaı otyr. Aqtóbede ár adamǵa 104 teńge. Turǵyndardyń 60% qoqys shyǵarýǵa tólemin jasamaı júr. Sondaı-aq Aqtóbede iri qoqysty jınaý máselesi kúrdeli bolyp tur. Máselen jıhazdar, qurylys qaldyqtary, santehnıkany shyǵarý máselesi tarıfke engizilmegen», - dep habarlady qalalyq turǵyn úı – kommýnaldyq sharýashylyq bóliminiń baspasóz qyzmeti.
Aqtóbe qalasynyń ákimi Mavr Abdýllınniń tapsyrmasymen jedel shtab quryldy. Eki qoqys kompanııasyna tıesili aýmaqty ózge kompanııa tazalaıdy. Olar ázirge aqysyz qyzmet kórsetpek. Ári turmystyq qatty qaldyqtardy shyǵarýǵa jańa baıqaý jarııalanady.
Eske salsaq, Aqtóbedegi eki qoqys kompanııasy jumysyn toqtatyp, 2018 jyly qala aýmaǵy on bólikke bólindi. Sáıkesinshe 10 kompanııa qyzmet kórsetýin bastaǵanymen arada aılar ótkende bári birinen soń biri jabyldy.
Búginde sońǵy úsh kompanııanyń ekeýi jumysyn toqtatty.
