Aqtóbe qalasynda Qarǵaly ózeni kóterilip, adamdar evakýatsııalanyp jatyr
Aqtóbe qalasynyń aýmaǵynda ornalasqan Qarǵaly, Kúnshýaq, Munaıshy baý-baqsha ujymdaryna qaýip tóndi.
Qazirgi kezde Qarǵaly ózeni kóterilip, adamdar evakýatsııalanyp jatyr.
«Oblystyq TJD qyzmetkerleri 95 adamdy evakýatsııalady. Onyń 40-y bala. Qazirgi kezde bul jumys jalǵasyp jatyr. Bul jumysqa 66/55 áskerı bóliminiń sarbazdary da jumyldyryldy», - dep habarlady oblystyq TJD baspasóz qyzmeti.
Aqtóbe qalasy ákiminiń baspasóz hatshysy Aıgúl Baımenovanyń aıtýynsha, qazirgi kezde saıajaıda ornalasqan úılerdiń aýlasyn sý basqan.
Úıdiń ishine kirmeýi úshin irgetasyna qum toly qap tóselip jatyr.
«Bıyl eki ese qar jaýdy. Qazir Jaman Qarǵaly ózeni tolyp, kún jylyǵanda tysqyn bolyp jatyr. Turǵyndarǵa aıtarymyz, Qarǵaly sý qoımasy ashylǵan joq. Onyń rezervi bar», - dedi qala ákimi Murat Jórebekov.
Adamdar olımpıada rezervterin daıarlaý sport mektebi men kolledj jataqhanasyna ornalastyryldy.
Keıbiri óz týǵan-týysynyń úıin panalap ketken.
«66/55 áskerı bóliminiń jedel batalonynyń jeke quramy atalǵan aýdandardaǵy tótenshe jaǵdaılardyń saldaryn joıýǵa jumyldyrylǵan. Áskerı qyzmetshiler kún ishinde sý jolyndaǵy kósheler men aýlalardy topyraq pen qum salynǵan qaptarmen kúsheıtti. Sonymen qatar sý basqan turǵyn úılerdiń aýlasy men joldardy tazartty. Biz kez kelgen kómekke árkezde daıynbyz», - deıdi 6655 áskerı bóliminiń shtab bastyǵy Dáýren Jaǵyparov.
Aıta keteıik, buǵan deıin oblysta Qobda jáne Oıyl aýdandarynda da aýyldardy sý basqan edi. Eki aýdanda jergilikti deńgeıdegi tótenshe jaǵdaı jarııalandy.
