Aqtóbe qalasynda eginniń 60 paıyzy kúıip ketti
AQTÓBE. QazAqparat – Aqtóbe qalasynda bıyl 7 myń gektar jerge dándi daqyl sebildi. Onyń 4,5 myń gektary kúıip, esepten shyǵaryldy, dep habarlaıdy QazAqparat tilshisi.
Aqtóbe qalasy mańynda egin egetin sharýalar bıyl astyq jınaı almady. Kóbi kúıip ketti.
«Dán ýaqytyly sebilip, jumys josparǵa saı júrgenimen maýsymda kún qatty ystyq boldy. Jańbyr jaýmady. Munyń bári keri áserin tıgizdi. Sharýa qojalyq basshylary 4,5 myń gektar jerdi esepten shyǵardy. Ol jerge kombaın jiberýdiń de qajeti bolmady. Tamyz aıynda 2,4 myń gektar jer oryldy. Túsimi 2,2 tsentner. Qazir 500 tonna ǵana dándi daqyl jınaldy. Byltyr 6 myń tonna jınap júr edik. Soǵan qaramastan mal azyǵyn jınap jatyrmyz. Kópjyldyq shóp, jońyshqa ósirdik. Munda da bıyl gektarynan 1,5 tsentner jınaldy. Ótken jylmen salystyrǵanda eki ese az», - dedi Aqtóbe qalalyq aýyl sharýashylyǵy bóliminiń basshysy Murat Toqbolatov.
Aıta keteıik, bıyl mal aǵyzynyń baǵasyn tómendetý úshin bıýdjetten 6 mlrd teńgeden astam qarjy bólindi.
Oblystaǵy sharýalarǵa tek shóp emes, jemdi de satyp alýǵa múmkindik beriledi.
«Maıly daqyldardyń shyǵymy da kóńil kónshitpeıdi. Ystyq boldy, ekinshiden, juldyzqurt qaptap ketti. Maqsaryny gektarynan 6-7 tsentner jınaımyz dep otyr edik, biraq 2 tsentnerden ári aspaıtyn sııaqty. Eki aptanyń ishinde maıly daqyldy jınaýdy da aıaqtaımyz»,- dedi Murat Toqbolatov.
