Aqtóbe qalasynda balabaqsha jumysy keıinge shegerildi
AQTÓBE. QazAqparat - Aqtóbede koronavırýs ınfektsııasyn juqtyrǵandar sany kóbeıip, balabaqsha jumysy keıinge shegerildi, dep habarlaıdy QazAqparat tilshisi.
Aqtóbe oblysynyń bas sanıtar dárigeri «Aqtóbe oblysyndaǵy koronavırýs ınfektsııasy boıynsha ári qaraı júrgiziletin shekteý sharalary jáne Aqtóbe qalasyndaǵy karantın rejımi týraly» jańa qaýly shyǵardy.
Qujatta blokpostardaǵy sanıtarlyq-karantındik baqylaý jumysyn kúsheıtý tapsyryldy. Basqa óńirlerden keletin adamdardy, onyń ishinde Aqtóbe qalasynyń jáne Aqtóbe oblysynyń turǵyndaryn PTR ádisimen testileý arqyly ótkizý úshin 2 táýlik karantındik statsıonarda oqshaýlaý qajet. Keıin 14 kún úı karantıninde baqylaýdy jalǵastyrady.
Al vahtalyq ádispen jumys isteıtin adamdar aýysym saıyn PTR tapsyrýy tıis. Ári barlyǵy Aqtóbe oblysynyń taýarlar men qyzmetterdiń sapasy men qaýipsizdigin baqylaý departamentiniń baqylaýynda bolady.
«Oıyn-saýyq, sporttyq jáne basqa da buqaralyq is-sharalardy uıymdastyrýǵa, sondaı-aq qonaq shaqyryp, sadaqa jasaýǵa, dinı nysandarǵa barýǵa tyıym salynady. Qalada vırýs juqtyrǵandar sany 7% ósti. Sondyqtan qala ákimdigi azyq-túlik, mal, avtomobıl, kıim-keshek, qurylys bazarlaryn, aýdany 2 myń sharshy metr bolatyn azyq-túlik emes dúkenderdi, sport obektilerin, saýda-oıyn-saýyq ortalyqtary, kınoteatrlar, teatrlar, kórmeler jáne adamdar kóp jınalatyn basqa da obektilerdi, mektepke deıingi uıymdardaǵy kezekshi toptardy, vokzaldardy ashý, aýyl sharýashylyǵy jármeńkesin ótkizýdi keıinge shegerýi tıis. Jazǵy saýyqtyrý lagerleri, fıtnes klýbtar, jattyǵý zaldary, sport keshenderi, basseın, akvapark, bılıard, boýlıng ortalyqtary, kompıýterlik ınternet-klýbtar, oıyn zaldary, býkmekerlik keńseler, loto ashylmaıdy. Adamdar da asa qajet bolmasa úıden shyqpaǵan jón. Kópshilik orynda maska kııý mindetteledi», - dep habarlady Aqtóbe oblysynyń taýarlar men qyzmetterdiń sapasy men qaýipsizdigin baqylaý departamentiniń baspasóz qyzmeti.
