Aqtóbe qalasynda 6 sáýirde karantın engiziledi
AQTÓBE. QazAqparat - Aqtóbede 6 sáýir kúni saǵat 21:00-den bastap karantın engiziledi, dep habarlaıdy QazAqparat tilshisi.
Aqtóbe qalasynda 11 adam koronavırýs ınfektsııasyn juqtyrǵan. Oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva tikeleı efır arqyly erteń saǵat 21:00-den bastap qalada karantın engiziletin málimdedi.
«Azamattardyń ómiri men densaýlyǵyn saqtaý maqsatynda Aqtóbe qalasy aýmaǵynda tótenshe jaǵdaı aıaqtalǵanǵa deıin karantın jarııalanady. Birinshiden, qalada barlyq mekemeler jumysy toqtaıdy. Tizim áleýmettik jelide, ákimdik saıtynda jarııalanady. Qoǵamdyq demalys oryndary, saıabaqtar, balalar alańyna barýǵa bolmaıdy. Ekinshiden, kóliktiń barlyq túri qaladan shyqpaıdy, kirmeıdi. Qaýly keıbir azamattardyń júrip- turýyna ruqsat beredi. Tizimi arnaıy jarııalanady. Úshinshiden, qoǵamdyq kólik qozǵalysyna keste engiziledi. Máselen, tańerteń 7:00-9:00, túste 12:00-14:00, keshke 17:00-21:00 aralyǵyna bekitildi. Qala aýmaǵynda zalalsyzdandyrý jumysy kúsheıtiledi. Tek medıtsına qyzmetkeri, polıtsııa men kommýnaldyq mekeme jumysshylaryna eshqandaı shekteý joq. Azyq-túlik, dárihanaǵa barýǵa bolady. Asa qajet bolmasa úıden shyqpaýdy suraımyz. Azyq-túlik dúkenderi 10:00-20:00 aralyǵynda jumys isteıdi. Qala aýmaǵynda jeke kólikpen júrýge tyıym salynady», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva.
Aıta keteıik, indetke shaldyqqandardyń jeteýi shetelden vırýs juqtyrǵan, ózgesi sol adamdarmen baılanysta bolǵan. Máselen keshe anyqtalǵan úsh jaǵdaıdyń ekeýi Qobda aýdanyndaǵy blokpostta tirkeldi. Qazaqstannyń eki azamaty «Máskeý-Voronej-Túrkistan» baǵytymen kele jatyp, ózin jaısyz sezingeni týraly habar bergen. Biriniń jolda ystyǵy kóterilip, tamaǵy qyshyp, boıynan ál ketken. Habar túsken boıda blokpostqa jedel járdem brıgadasy shaqyrylyp, naýqas júrgizýshi men onyń serigi oblystyq juqpaly aýrýlar aýrýhanasyna jatqyzyldy. Vırýsologııalyq analızden soń olardyń qaýipti indetti juqtyrǵandary rastaldy.
«Aqtóbe qalasynda karantın engizilip, aýdandarda erekshe shekteý sol kúıi qalady. Qazir oblysta 28 blokpost bar», - dedi jergilikti arnada ótken tikeleı efır kezinde oblys ákiminiń birinshi orynbasary Nurjaýǵan Qalaýov.
