Aqtóbe qalasy eki aýdanǵa bólinedi
AQTÓBE. QazAqparat -Aqtóbe qalasyn eki aýdanǵa bólý josparlanyp otyr. Aýdandardy qurý, olarǵa ataý berý máseleleri qoǵamdyq tyńdaýlar barysynda talqylanatyn bolady, dep habarlaıdy QazAqparat tilshisi.
Aqtóbe aglomeratsııasy aıasynda oblys ortalyǵyn damytý boıynsha birneshe jospar quryldy. Qazirgi ýaqytta qalany eki aýdanǵa bólý josparlanǵan. Aqtóbe qalasy ákiminiń baspasóz qyzmetinen habarlaǵandaı, qala mańyndaǵy bes eldi mekendi (Blagodar, Qarǵaly, Qýraıly, Novyı jáne Sazdy) Aqtóbe qalasyna qosý josparlanyp otyr.
«1988 jylǵa deıin Aqtóbede eki aýdan boldy: Proletarlyq jáne Frýnze. Búgingi kúni mundaı aýdandar Astana, Almaty, Shymkent jáne Qaraǵandy qalalarynda bar. Aqtóbe mańyndaǵy bes aýyldyq okrýgtiń qashyqtyǵy 2-den 25 shaqyrymǵa deıin quraıdy. Jańa turǵyn úı keshenderin jáne jeke turǵyn úı qurylysyn damytý esebinen Aqtóbe qalasyna 2 aýyldyq okrýg, ıaǵnı Qarǵaly, Novyı biriktiriledi. Aýyldyq okrýgterdiń qashyqtyǵy 2-den 5 shaqyrymǵa deıin quraıdy. Bul eki aýylda aýyl sharýashylyǵy damymaı qalǵan. Turǵyn úı qurylysynyń damytylýyna baılanysty jekemenshik qosalqy alańdarda maldyń jaıylymdary qysqartyldy. Jalpy alǵanda bul jumys salyq pen basqa da tólemderdi, sondaı-aq belsendi shaǵyn jáne orta bıznes sýbektileriniń sanyn kóbeıtýge múmkindik beredi. Aqtóbe qalasy turǵyndarynyń ómir súrýin baqylaýǵa, qyzmet kórsetý sapasyn arttyrýǵa jol ashylady», - dep habarlady baspasóz qyzmetinen.
Bul jergilikti bıliktiń túbegeıli sheshimi emes. Aldaǵy ýaqytta qoǵamdyq tyńdaýlar ótip, oblystyq máslıhattyń kezekten tys on segizinshi sessııasynda qaralady. Sol kezde ataý berý máselesi de talqylanady.
