Aqtóbe qalasynyń jan-jaǵynda sý burý kanaldary salynyp jatyr
AQTÓBE. KAZINFORM – Kóktemgi tasqyn kezinde sý jınalǵan aýmaqtarda sý burý aryqtary qazylyp, salynyp jatyr. Jınalǵan qar sýlary ózenderge quıady.
Aqtóbe qalasynyń birneshe turǵyn alabynda kóktemgi sý tasqynyna qarsy kúres jumystary júrgizilip jatyr. Sý burý arnalarynyń biri Qurashasaı jáne Qanaǵat turǵyn alaptarynda salyndy. Munda uzyndyǵy 3,5 shaqyrymdyq kanal qazylyp jatyr. Bul jumys byltyr bastalǵan.
- Qurashasaı men Qanaǵat turǵyn alabyndaǵy úılerge kóktemgi sý tasqyny kezinde qaýip tóndi. Bul máseleni sheshý úshin byltyr aınalma kanaldyń qurylysy bastaldy. Biz jumystyń basym bóligin bitirdik. Osy kanaldyń arqasynda bıyl bul turǵyn alaptarynda ornalasqan úıler sý basýdan aman qaldy. Qazir topyraqty tazartý jumystary júrip jatyr. Qurylystyń arqasynda erigen qar sýy eldi mekenderdi aınalyp ótip, Jińishke ózenine quıady, - dedi merdiger kompanııa basshysy Aleksandr Lısıtskıı.
Aqtóbe oblysy ákimi baspasóz qyzmetiniń habarlaýynsha, Jańa qonys-3, Shestıhatka, Dýman, Saıa, Maǵadja jáne Kóktem sekildi taǵy alty turǵyn alabynda kanal salynyp jatyr. Sonymen birge sý basqan baý-baqsha ujymdaryna erekshe nazar aýdarylady. Qazir erigen qar sýyn burý boıynsha is-sharalar «Aqtóberentgen-14, 16», «Zelenstroı-1, 2», «AZHS-1, 5, 3», «AZF-1, 2» saıajaı ujymdarynda qolǵa alynǵan.
- Sý tasqynyna qarsy is-sharalar aıasynda Aqtóbe sý qoımasyn qaıta jańartý jumystary júrgizilip jatyr. Bul – strategııalyq nysan. Osy kóktemde sý qoımasy úlken sý aǵynyn ustap qaldy. Onyń qaýipsizdigin odan ári nyǵaıtý, sondaı-aq tótenshe jaǵdaılardy boldyrmaý maqsatynda biz ony qaıta qurýdy bastadyq. Sonymen qatar sý qoımasynyń túbindegi shógindilerdi tazartý jumystary júrgiziledi. Qalada jáne birqatar aýylda bógetter jóndelip, kópirler nyǵaıtylyp jatyr. Oblys boıynsha 22 joba bar. Olarǵa 2,8 mıllıard teńge bólindi. Sý tasqynyna qarsy is-sharalardy tıimdi úılestirý úshin biz halyqpen kezdesip, aqsaqaldarmen keńese otyryp, júrgizýdemiz, - dedi oblys ákimi.
Sý burý arnalarynyń qurylysy men bógetterdi jóndeý jumystary qys mezgiline deıin aıaqtalady dep josparlanǵan.
Eske salsaq, bıyl Aqtóbe qalasy mańyndaǵy sý qoımalary tolyp, sý jiberildi. Saldarynan ózen jaǵasy men baý-baqsha ujymdaryndaǵy 3 myńnan astam úıge tehnıkalyq baqylaý júrgizildi.
