Aqtóbe qalasynyń ortasymen aǵatyn Sazdy ózeninde balyq qyryldy
AQTÓBE. KAZINFORM — Inspektsııa mamandary 20 keli balyq jınady. Balyq synamasy taldaýǵa jiberildi.
Aqtóbe qalasynyń ortasymen aǵatyn Sazdy ózeninde qazir sý tartylyp qalǵan. Keı tusynda sýdyń tabany kórinip jatyr.
— Tobyl-Torǵaı oblysaralyq basseındik balyq sharýashylyǵy ınspektsııasynyń qyzmetkerleri ózenge baryp, alabuǵa men taban balyǵynyń shabaǵyn jınady. Salmaǵy — 20 keli. Balyq pen sýdan synama alynyp, zerthanaǵa jiberildi. Zerthanalyq taldaýdan soń balyqtyń qyrylý sebebi anyqtalady, — dep habarlady Tobyl-Torǵaı oblysaralyq basseındik balyq sharýashylyǵy ınspektsııasy.
Aqtóbe qalasynyń ákimdigi bolsa sý tasqyny kezeńiniń aıaqtalýyn kútip otyr.
— Bıyl sý taıaz boldy. Az sý muz bolyp qatqanda astynda balyq ólýi múmkin nemese ólgen balyqty sý aǵyzyp ákelgen. Inspektsııa mamandary kelip, qyrylǵan balyqty jınap ketti. Negizi kóktemgi sý tasqyny kezeńinde bul jerden sý júredi dep kútip otyrmyz. Sodan soń shylaý, qoqystan tazalanady, — dep habarlady Aqtóbe qalasy ákiminiń baspasóz qyzmeti.
Buǵan deıin habarlaǵanymyzdaı, Batys Qazaqstanda Saryaıdyn kólinde balyq qyrylyp qaldy. Sebebi, muz óte qalyń boldy, ózende 70-80 santımetrge deıin bardy.
