Aqtóbe qalasynyń ortalyǵynda jylý qubyry jaryldy
AQTÓBE. KAZINFORM — Qubyr jarylǵan kezde balabaqsha men birneshe úı jylýdan ajyratyldy. Jóndeý jumysy júrgizilip jatyr.
Aqtóbe qalasynyń ortalyǵyndaǵy Álııa Moldaǵulova dańǵyly boıynda jylý qubyry syr berdi. Dıametri 720 mm bolatyn qubyr jarylyp, birneshe úıge jylý berý ýaqytsha toqtatyldy. Ystyq sý keri aınalym arqyly berilip jatyr.
— Aqtóbe qalasyndaǵy Indýstrıalnaıa kóshesinde ornalasqan balabaqsha, Álııa Moldaǵulova dańǵylyndaǵy № 3, 5, 7, 9, 11, 13 jáne Tilepbergenov kóshesindegi № 78, 80, Ábilqaıyr han dańǵylyndaǵy № 69 úılerge jylý berý ýaqytsha toqtady. Qazir 20 qyzmetker jumys istep jatyr. Apat bolǵan aımaqta 10 tehnıka bar, — dep habarlady «Aqtobe su-energy» AQ-nyń baspasóz qyzmeti.
Buǵan deıin habarlaǵanymyzdaı, Temirtaýda magıstraldyq qubyr jarylyp, ondaǵan úı jylýsyz qaldy. Mundaı apatty jaǵdaı Óskemende de tirkeldi.