Aqtóbe qalasynyń ákimdigi shaǵyn sáýlet músinin ornatý kezinde qandaı quıturqy áreket jasady
AQTÓBE. KAZINFORM – Aqtóbe qalasynyń ákimdigi shaǵyn sáýlet músinin ornatýǵa kelisken merdigerge eki ret qarjy aýdardy. Biraq jumys kólemi ózgermegen. Jemqorlyq táýekelderin anyqtaǵan Antıkor ony joıýdy usyndy.
QR Sybaılas jemqorlyqqa qarsy is-qımyl agenttigi Aqtóbe oblysy boıynsha departamenti qaladaǵy turǵyn úı-kommýnaldyq sharýashylyǵy bólimine montorıng júrgizdi. Memlekettik satyp alý zańdylyqtaryn saralaý kezinde shaǵyn sáýlet músinin ornatý úshin 46 mln teńge usynǵany belgili boldy.
Al «Qaısar Relations» JShS-i bul jumysty 25,2 mln teńgege atqarýǵa ýáde etedi. Keıin arada 15 kún ótkende qalalyq TÚKSh bólimi osy kompanııaǵa taǵy 18,6 mln teńge bólip, qosymsha kelisimshart jasaıdy. Alaıda jumys kólemin arttyrmaı, sol kúıi qaldyrady. Sóıtip kompanııa 43,8 mln teńge qarjyǵa alǵashqy kelisimsharttyń jumysyn atqarady.
- 2023 jyldyń sáýir aıynda Aqtóbe qalasy Almaty aýdany ákiminiń apparaty jáne «Qaısar Relations» JShS-i 25 mln teńgeniń kelisimshartyna qol qoıady. Tehnıkalyq negizdemede 8 shaǵyn sáýlet músinin ornatý týraly jazylǵan. Onyń ishinde Raýan, Bekqul baba, Qyzyljar, Nokın turǵyn alaptarynyń atyn jazý kelisimsharty bar. Sonymen birge byltyr maýsym aıynda taǵy 5 shaǵyn sáýlet músinin ornatý úshin qosymsha kelisimshart jasalady. Oǵan 15 mln teńge qarastyryldy. Elektrondy aktte jumystyń tolyq kólemde atqarylǵany, qarjynyń aýdarylǵany jazylǵan. Kelisimshart talaptary boıynsha shaǵyn músindi kútip ustaýǵa 1 jyldyq kepildik bar. Soǵan qaramastan Aqtóbe qalasy Almaty aýdany ákimdigi «Esıl-2018» JShS-i kelisimshartqa qol qoıyp, jumystarǵa 17,6 mln teńge qarastyryldy. Dál osyndaı jaǵdaı Astana aýdany ákimdiginde de tirkeldi, - dedi QR Sybaılas jemqorlyqqa qarsy is-qımyl agenttigi Aqtóbe oblysy boıynsha departamentiniń basshysy Esqalı Salamatov.
Nátıjesinde qosymsha kelisimsharttar arqyly joba quny 35,6 mln teńgege artty. ıAǵnı, básekelestik joq. Usynǵan qarjynyń teń jartysyna jumys isteýge ýáde berip, keıin qosymsha kelisimshartpen alǵashqy satyp alýdaǵy somany alý jemqorlyq táýekelin arttyrǵan.
- Memlekettik satyp alýǵa qatysýshylardyń quqyǵyn shekteý, talapqa sáıkes emes jumystardy qabyldaý, smeta qunyn negizsiz asyrý faktileri, múddeler qaqtyǵysy men laýazymdy tulǵalardyń dıskretsııalyq ókilettilikteri anyqtalyp otyr. Mysaly 2022 jyly qalalyq ákimdik quny 444,6 mln teńge bolatyn «Qala úılerin sándik jaryqtandyrý» jobasyn júzege asyrǵan.
Tapsyrys berýshi - qalalyq turǵyn-úı kommýnaldyq sharýashylyǵy bólimi. Munda áleýetti ónim berýshilerge sándik-árleý jumystary salasynda tájirıbeniń bolýy talabyn negizsiz belgilegen.Búgingi kúni taldaý aıaqtalyp, jemqorlyq táýekelderin joıý jospary ázirlenip jatyr,- dedi Esqalı Salamatov.
Eske salsaq, Aqtóbede Antıkor sport salasyndaǵy zań buzýshylyqtardy tekserip, 10 dırektor men bapkerdiń jalǵan dıplommen jumys istep júrgenin anyqtady. Sonymen birge syıaqyny zańsyz berý deregin tirkedi.
